NCP Crisis : राष्ट्रवादी काँग्रेस पक्ष कोणाचा? जयंतरावांनी 25 वर्षांचा दाखला देत पहिल्यांदाच स्पष्ट केली भूमिका

मिरज : राष्ट्रवादी काँग्रेस पक्ष हा शरद पवारसाहेबांचा (Sharad Pawar) आहे. ना पक्ष जयंत पाटलांचा आहे ना अजित पवारांचा साहेबांकडून आलेले आदेश आम्ही गेली २५ वर्षे मानतो, असं स्पष्ट मत जयंत पाटील यांनी व्यक्त केलं.

साहेबांचा २५ वर्षांचा निर्णय अजित पवारांच्या एका भेटीनंतर एका दिवसात फिरतील असे वाटत नाही, असंही राष्ट्रवादी काँग्रेसचे प्रदेशाध्यक्ष जयंत पाटील यांनी मिरजेत पत्रकारांशी बोलताना सांगितलं.

राष्ट्रवादी काँग्रेसच्या अजितदादा गटाने सत्तेत सहभागानंतर प्रथमच मिरजेतील सर्वपक्षीय कार्यक्रमानिमित्त शरद पवार गटाचे प्रदेशाध्यक्ष जयंत पाटील यांनी आपली भूमिका स्पष्ट केली.

ते म्हणाले, पवारसाहेबांची भूमिका ही आमची भूमिका राहील. पलीकडे गेलेल्या आमदारांची भूमिका वेगळी असेल असं मला वाटत नाही. अद्याप दादा गटात गेलेल्या पैकी कोणाची चर्चा झाली नाही. मात्र, मी कायम शरद पवारांसोबत असेल अशी स्पष्ट भूमिका त्यांनी व्यक्त केली. तसेच शरद पवार सांगतील ती दिशा आणि शरद पवार सांगतील ते धोरण असल्याचे त्यांनी आवर्जून सांगितले.

आमच्याच पक्षात एवढा मोठा गोंधळ झाल्यानंतर पक्ष एक ठेवने महत्त्वाचं होतं. पाच वर्षांपासून पक्षाचा प्रदेशाध्यक्ष आहे. पक्ष वाढीसाठी चांगले प्रयत्न केले आहेत. मोठा पक्ष होण्यासाठी प्रयत्न सुरू होते. आणि पक्षात गोंधळ झाला. यावेळी महापौर दिग्विजय सूर्यवंशी, महापालिकेचे गटनेते मैनुद्दीन बागवान, जिल्हा बँकेचे संचालक बाळासाहेब होनमोरे, संजय बजाज, शहराध्यक्ष अभिजित हारगे उपस्थित होते.

१९ आमदारांचा पाठिंबा

पवारसाहेबांना एकूण १९ आमदारांनी प्रतिज्ञापत्राद्वारे पाठिंबा दिला आहे. आमची संख्या कमी आहे हे आम्ही मान्य करतो.

अधिवेशनात शेतकऱ्यांचे प्रश्न मांडणार

१७ जुलैपासून होणाऱ्या पावसाळी अधिवेशनात पाऊस कमी झाल्यामुळे शेतकऱ्यांची नुकसानभरपाई, राज्यातील गुन्हेगारी यासह अन्य प्रश्न मांडणार आहे.