Hasan Mushriff : मुलीच्या घरात गेले, सासूला त्रास दिला; छाप्यानंतर संतापलेल्या मुश्रीफांची प्रतिक्रिया

राष्ट्रवादीचे नेते हसन मुश्रीफ यांच्या मालमत्तांवर आज सकाळपासून ईडीकडून छापेमारी सुरू आहे. कथित साखर घोटाळ्याप्रकरणी हे छापे पडत आहेत. त्याबद्दल आता हसन मुश्रीफ यांनी पत्रकार परिषद घेत आपली भूमिका मांडली आहे.

या कारखान्याशी आपला कोणताही संबंध नाही, असं सांगत मुश्रीफांनी आपल्यावरचे आरोप फेटाळले आहेत. किरीट सोमय्या यांनी दीड वर्षापूर्वीच आरोप केले होते आणि आपण पत्रकार परिषद घेऊन त्याची उत्तर दिल्याचंही मुश्रीफ यांनी सांगितलं. तर किरीट सोमय्यांवर बदनामीसाठी दीड कोटीची केस केल्याचंही मुश्रीफांनी आज झालेल्या पत्रकार परिषदेत सांगितलं आहे.

आपल्या घरच्यांनाही या छापेमारीमध्ये त्रास झाल्याचा आरोप हसन मुश्रीफ यांनी केला आहे. मुश्रीफ म्हणाले, "आमचा, माझ्या कुटुंबियांचा काहीही संबंध नसताना आरोप केले जात आहे. इनकम टॅक्सकडूनही कारवाई करण्यात आली पण आता त्यावर स्थगिती देण्यात आली आहे. आता ईडी कशाबद्दल छापे मारत आहे माहित नाही. कशासाठी हे सगळं सुरू आहे?"

मुश्रीफ पुढे म्हणाले,"माझ्या मुलीच्या घरीसुद्धा छापेमारी सुरू आहे. तिच्या घरात हे गेले, सासूला त्रास दिला, घरात नातवंडंही होती. पोलिस त्यांना घाबरवत आहेत. कारवाई करायची आहे तर आम्हाला समन्स द्या, चौकशीसाठी बोलवा. पण मुलाबाळांना त्रास का देता? सत्ता आल्यावरही तुम्ही थांबत नाही. चार वर्षांपूर्वीही छापा पडला होता. तेव्हाही इनकम टॅक्सने माझ्या मुलाबाळांना बोलावलं होतं."