Sanjay Shirsat : 'शिवसेना संपेल तेव्हा संजय राऊत हे शरद पवारांच्या मांडीवर बसलेले दिसतील'

हिवाळी अधिवेशनाच्या दरम्यान विरोधकांनी सत्ताधारी मुख्यमंत्री एकनाथ शिंदे यांच्यावर भूखंडांचा आरोप केला आहे. विरोधकांच्या या आरोपांवर शिंदे गटाकडून आक्रमकपणे उत्तर दिलं जात आहे. शिंदे गटाचे आमदार संजय शिरसाट यांनी याच मुद्दावरून ठाकरे गटाला धारेवर धरलं आहे. तसेच त्यांनी यावेळी ठाकरे गटाचे खासदार संजय राऊत यांच्यावर देखील हल्लाबोल केला आहे.

जेव्हा एकनाथ शिंदे शिवसेनेत होते तेव्हा तुमची सत्ता होती तेव्हा तुम्ही कोणत्याही गोष्टींची चौकशी केली नाही. उलट एकनाथ शिंदे यांना त्रास दिल्याचा आरोप संजय शिरसाट यांनी केला आहे. आता त्यांची सत्ता आहे, त्यांचं काम व्यवस्थित रित्या सुरू आहे म्हणून तुम्ही रिकामे आरोप करत असल्याचं संजय शिरसाट यांनी म्हटलं आहे. सध्या उद्धव ठाकरेंची शिवसेना ही राष्ट्रवादी काँग्रेस चालवत आहे असा आरोपही त्यांनी यावेळी केला आहे.

पुढे बोलताना संजय शिरसाट म्हणाले की, सध्या उद्धव ठाकरेंची शिवसेना ही राष्ट्रवादी काँग्रेस चालवत आहे. खासदार संजय राऊत हे शिवसेनेचे नाही तर शरद पवारांच्या राष्ट्रवादी काँग्रेसचे प्रवक्ते आहेत. ज्या दिवशी शिवसेना संपेल त्या दिवशी संजय राऊत हे शरद पवारांच्या मांडीवर बसलेले दिसतील असा टोलाही संजय शिरसाट यांनी लगावला आहे.