PM Modi in Mumbai : मोदींना इथं यावं लागतंय म्हणजे इथलं भाजपा नेतृत्व कमकुवत आहे - संजय राऊत

पंतप्रधान नरेंद्र मोदी आज मुंबईत आहेत. मुंबई महानगरपालिका निवडणुकीच्या दृष्टीने मोदींचा दौरा महत्त्वाचा मानला जातो. महिन्याभरातला हा दुसरा दौऱा आहे. त्यावरुन शिवसेना उद्धव बाळासाहेब ठाकरे गटाचे खासदार संजय राऊत यांनी मोदींवर टीका केली आहे.

माध्यमांशी बोलताना संजय राऊत म्हणाले, "मुंबई महानगरपालिकेच्या निवडणूक त्यांच्या पक्षाने फार गांभीर्याने घेतल्या आहेत. पण देशासमोर वेगळे प्रश्न आहेत. संसदेत विरोधकांनी अदानीच्या खिशात एवढा पैसे कुठून आला याबाबत प्रश्न उपस्थित केले आहेत. याचे उत्तर मोदी द्यायला तयार नाहीत पण ते निवडणूक प्रचारात व्यस्त आहेत.

पंतप्रधानांच्या दौऱ्याबद्दल बोलताना संजय राऊत पुढे म्हणाले, " पंतप्रधानांना मुंबईत यावं लागतंय म्हणजे भाजपचं इथलं राज्याचं नेतृत्व कमकुवत आहे असा याचा अर्थ होतो. यापूर्वी कधी नव्हे इतके पैसे केंद्राकडून राज्याला मिळाले असं म्हणणं म्हणजे यापूर्वी केंद्र महाराष्ट्राला सूडबुद्धीने वागवत होते हे स्पष्ट होतं. असं करून त्यांनी महाराष्ट्राशी वैर घेतलेला आहे. सरकार डबल इंजिनचा असो ट्रिपल किंवा चार इंजिनचा असो. अथवा हवेत उडणारा असो मुंबईत शिवसेनेचाच भगवा फडकणार."