MPSC Syllabus : एमपीएससी विद्यार्थ्यांच्या आंदोलनाला पोलिसांनी परवानगी नाकारली

पुणेः एमपीएससी करणाऱ्या विद्यार्थ्यांनी उद्या पुण्यामध्ये आंदोलनाची हाक दिली होती. परंतु हे आंदोलन आचारसंहितेच्या कारणामुळे होणार नसल्याची शक्यता आहे. कारण पोलिसांनी आंदोलनासाठी परवानगी नाकारलेली आहे.

उद्या सकाळी ८ वाजता अलका चौकात एमपीएससी विद्यार्थ्यांचे आंदोलन होणार होते. परंतु कसबा पेठ निवडणुकीमुळे मतदार संघात आचारसंहिता लागू आहे. यामुळे कोणतेही आंदोलन करण्यास पोलिसांकडून मनाई करण्यात आली आहे.

राज्यसेवा मुख्य परीक्षेचा पॅटर्न 2025 पासून लागू करावा यासाठी विद्यार्थ्यांनी 31 डिसेंबरला आंदोलन केले होते. यानंतर सरकारने विद्यार्थ्यांच्या मागण्यांना तत्वतः मंजुरी दिली. तरीही आयोगाने अद्याप घोषणा केली नाही.

यासाठी विद्यार्थी पुन्हा एकदा आंदोलनाच्या पावित्र्यात आहेत. मात्र आता पोलिसांनीच आंदोलनाला परवानगी नाकारल्यामुळे विद्यार्थी काय भूमिका घेणार, महाराष्ट्राचं लक्ष लागून राहिलं आहे.

राज्यसेवा मुख्य परीक्षेचा पॅटर्न 2025 पासून लागू करावा ही विद्यार्थ्यांची मुख्य मागणी आहे. या मागणीसाठी विद्यार्थ्यांनी वारंवार आंदोलन केलेलं आहे. सरकारने या मागणीला मंजुरी दिलेली असली तरी आयोगाने मात्र याबाबत कुठलाही निर्णय घेतलेला नाही. त्यामुळेच विद्यार्थी संतप्त झाले आहे.