Agneepath: या योजनेमागे भाजप, RSSचा गुप्त अजेंडा - प्रकाश आंबेडकर

मुंबई : सध्या देशभरात अग्निपथ लष्कर भरतीवरून गदारोळ पाहायला मिळत आहे. देशभरातील अनेक ठिकाणी हिंसाचार उसळला असून बिहारमध्ये आंदोलकांकडून रेल्वेची जाळपोळ करण्यात आली आहे. यामुळे बिहारमधील १२ शहरातील इंटरनेट सेवा बंद करण्यात आली आहे. केंद्र सरकारच्या या योजनेच्या अनेक स्तरातून विरोध होताना पाहायला मिळत आहे. दरम्यान वंचित बहुजन आघाडीचे प्रमुख प्रकाश आंबेडकर यांनी यामागे आरएसएसचा (RSS) मोठा अजेंडा असल्याचा आरोप केला आहे.

(Agneepath Scheme Row Update)

वंचितचे नेते प्रकाश आंबेडकर यांनी फेसबुक पोस्ट करत केंद्र सरकारवर निशाणा साधला आहे. त्यांनी आपल्या पोस्टमध्ये लिहिलंय की, "अग्नीवीर या योजनेमागे भाजपा आणि आरएसएसचा गुप्त अजेंडा आहे." असा आरोप करत त्यांनी "सरकारी तिजोरीवर पडणारा ताण कमी करणे, बेरोजगार तरुण सैनिक निर्माण करणे, जेणेकरून त्याचा फायदा हा नाझीसारख्या सेना निर्माण करण्यास मदत होईल व वैदिक हिंदू राष्ट्र बनविण्यासाठी या नाझी सेनेचा उपयोग करता येईल." असा आरोप केंद्रावर केला आहे.

दरम्यान केंद्र सरकारच्या या निर्णयाचा निषेध म्हणून देशभर सुरू असेलेल्या हिंसाचारामुळे रेल्वे मंत्रालयाने तब्बल ३७९ रेल्वेगाड्या रद्द केल्या आहेत. केंद्र सरकारने जाहीर केलेल्या अग्निपथ योजनेत चार वर्षांसाठी सैनिकांची भरती करण्याचा आणि त्यांचा कार्यकाळ संपल्यानंतर ७५ टक्के निवृत्ती वेतन आणि इतर सामाजिक सुरक्षा लाभांशिवाय निवृत्त करण्याचा प्रस्ताव आहे. या योजनेला देशातील विविध भागांतून तरुणांकडून तीव्र विरोध होत आहे. या योजनेला विरोध करणाऱ्या आंदोलकांनी रस्ते आणि रेल्वे मार्ग रोखले आणि रेल्वेचे डबे पेटवून दिले आहेत.

दरम्यान बिगर भाजप पक्षांकडून या निर्णयाचा विरोध होताना पाहायला मिळत असून अनेकांनी या निर्णयामुळे संरक्षण क्षेत्राचं खासगीकरण करण्याचा भाजपाचा प्रयत्न असल्याचा आरोप केला आहे. तर प्रकाश आंबेडकर यांनी यामागे भाजपचा आणि राष्ट्रीय स्वयंसेवक संघाचा गुप्त अजेंडा असल्याचा आरोप केला आहे.