Ajit Pawar Video : अजित पवारांकडून सावित्रीबाईंचा चुकीचा उल्लेख; भाजपच्या तुषार भोसलेंचं ट्विट

मुंबईः पुण्यामध्ये एका कार्यक्रमादरम्यान अजित पवार यांनी बोलण्याच्या ओघात सावित्रीबाई फुले यांच्या नावाचा चुकीचा उच्चार केला. हाच मुद्दा धरुन भाजपचे तुषार भोसले यांनी अजित पवार यांच्या माफीची मागणी केली आहे.

व्हीडिओमध्ये अजित पवार हे सावित्रीबाई फुले यांचा उल्लेख सावित्रीबाई होळकर करत आहेत. त्यानंतर त्यांनी ती चूक सुधारली. बोलण्याच्या ओघात पवार तसं बोलल्याचं दिसून येतंय.

परंतु हाच मुद्दा धरुन भाजपचे तुषार भोसले यांनी त्यांच्या 'आचार्य तुषार भोसले' या ट्विटर अकाऊंटवरुन एक पोस्ट केली आहे. अजित पवारांचा तो व्हीडिओ जोडून त्यासोबत ''ओ वाचाळवीर अजित पवार काय हे ? क्रांतीज्योती सावित्रीमाईंचा असा अपमान? आतातरी माफी मागणार की ठामच राहणार मग्रूर'' असं ट्विट केलं आहे.

यासंदर्भातील वृत्त 'टीव्ही ९' ने दिले आहे. राष्ट्रवादीचे आमदार अमोल मिटकरी यांनी यावर प्रतिक्रिया दिली आहे. ते म्हणाले, अजितदादांकडून जर आडनाव चुकलं असेल तर तिळपापड व्हायची गरज काय? तू वारकरी तरी आहेस का? कुठलं लक्षण आहे तुझ्याकडे वारकऱ्याचं? तुला कोणत्या मठातून लाथ मारून हाकललं, हे माहिती आहे'' असं मिटकरी म्हणाले.