Almatti Dam : महापुराचा धोका टळला? महाराष्ट्र सरकारचं लक्ष असलेलं 'आलमट्टी धरण' भरलं काठोकाठ, 60 हजार क्युसेक विसर्ग

चिक्कोडी : शेवटच्या टप्प्यात असतानाही आलमट्टी (Almatti Dam) शंभर टक्के भरून घेण्याबाबत प्रशासन सावध पाऊल टाकत आहे. दोन दिवसांपूर्वीच धरण ९९ टक्के भरले होते. मात्र, आवक होईल तितका विसर्ग करून साठा नियंत्रित करण्यात येत आहे.

यामुळे रविवारपेक्षा साठा किंचित सोमवारी (ता. ७) कमी झाला आहे. सोमवारी सकाळपासून धरणात ६४ हजार क्युसेक आवक होती. त्यामुळे विसर्गात पुन्हा बदल करून ६० हजार क्युसेक करण्यात आले आहे. रविवारी (ता. ६) आवक व विसर्गही ७० हजार क्युसेक करण्यात आला होता.

काल आवक कमी झाल्याने विसर्ग आणखी कमी केला आहे. दरम्यान, रविवारच्या विसर्गामुळे सोमवारी आलमट्टीच्या साठ्यात काहीशी घट झाली आहे. रविवारी जलाशयात १२१.६०६ टीएमसी (९८.८० टक्के) पाणीसाठा होता. सोमवारी संध्याकाळी धरणात ५१९.५० मीटर पातळी राखून १२१.२६२ टीएमसी (९८.५२ टक्के पाणी भरलेले आहे.

पावसाने उसंत घेतली असली तरी धरणात पाणी येण्याचे प्रमाण कायम आहे; पण पाणी साठा नियंत्रित करून आलमट्टी धरण प्रशासनाने अद्याप पूर्ण धरण भरण्याचे टाळले आहे. शनिवारी जवळपास ९९ टक्के धरण भरले होते. काल त्यामध्ये आणखी कमी पाणी झाले आहे. गेल्या चार दिवसांपासून रोज दोन ते तीन टीएमसी पाणीसाठा धरणात वाढत असतानाही पाणी भरून घेतले जात नसल्याने रोज इतके पाणी विसर्गाच्या माध्यमातून खाली जात आहे.