Raj Thackeray : राज ठाकरेंच्या सभेला मैदान देण्यास नकार, परवानगी न घेताच सभास्थळ केलं जाहीर

मुंबईः राज ठाकरे यांची रत्नागिरी येथे सभा होत आहे. परंतु या सभेसाठी जे मैदान निश्चित करण्यात आलेलं होतं, ते देण्यास संबंधित संस्थेने नकार दिलाय. त्यामुळे मनसेच्या अडचणींमध्ये वाढ होतांना दिसून येतेय.

येत्या ६ मे रोजी मनसे अध्यक्ष राज ठाकरे यांची रत्नागिरी येथे सभा होणार आहे. रत्नागिरीतल्या एज्युकेशन सोसायटीच्या जवाहर मैदानावर मनसेची सभा होणार होती.

हेही वाचाः संतुलित आहारातून रोखा फॅटी लिव्हरचा आजार

या सभेसाठी मनसेकडून सभास्थळाचे नावही जाहीर करण्यात आलेले होते. मात्र आज मनसेचे पदाधिकारी संस्थेकडे मैदानासंदर्भात विचारणा करण्यासाठी गेले तेव्हा त्यांना नकार देण्यात आला.

या संस्थेने मागील १० वर्षांपासून कोणत्याही राजकीय पक्षाला सभेसाठी मैदान दिलेले नाही. त्यामुळे आम्ही मैदान देणार नाही, असं संस्थेच्या वतीने मनसेच्या पदाधिकाऱ्यांना कळविण्यात आले.

रत्नागिरीतल्या इतर मैदानांवर राजकीय पक्षांच्या सभा होतात. मात्र मनसेने जवाहन मैदानावर सभा घेण्याचं निश्चित केलं होतं. परंतु संस्थेने मनसेला नकार कळवला आहे.

संस्थेच्या या निर्णयामुळे कमी दिवसांमध्ये मनसेला नवीन मैदान शोधून तिथे सभेची तयारी करावी लागणार आहे. राज ठाकरे हे ६ तारखेला रत्नागिरी येथे बोलणार आहेत. या सभेकडे सबंध महाराष्ट्राचं लक्ष लागून राहिलं आहे.