Shivaji Maharaj: 2024मध्ये जगदंबा तलवार महाराष्ट्रात येणार? राज्य सरकारचे प्रयत्न सुरू

मुंबईः महाराष्ट्राच्या गौरवशाली इतिहासाची साक्ष असणारी जगदंबा तलवार महाराष्ट्रात येण्याची शक्यता निर्माण झाली आहे. ब्रिटनचे नवनिर्वाचित पंतप्रधान ऋषी सुनक यांच्याकडे सरकारने पाठपुरावा सुरु केला आहे.

राज्याचे सांस्कृतिक मंत्री सुधीर मुनगंटीवार यांनी याबाबत बोलतांना सांगितलं की, २०२४मध्ये छत्रपती शिवाजी महाराजांच्या राज्याभिषेकाला साडेतिनशे वर्षे पूर्ण होत आहेत. त्यानिमित्त राज्य शासनाच्या वतीने विशेष कार्यक्रमाचा आराखडा करण्यात येत आहे. छत्रपती शिवाजी महाराजांची जगदंबा तलवार इंग्लंडकडून मिळावी, यासाठी प्रयत्न सुरु करण्यात आलेले आहेत. तसं झालं तर ही महाराष्ट्रासाठी अभिमानाची आणि गौरवाची बाब ठरणार असल्याचं मुनगंटीवार म्हणाले.

दरम्यान, १८७५-७६मध्ये ही तलवार इंग्लंडला गेल्याचं सांगितलं जातं. इंग्लंडचे प्रिन्स भारतात आल्यानंतर त्यांना काही भेटवस्तू देण्यात आल्या. त्यामध्ये जगदंबा तलवारदेखील भेट देण्यात आली होती. ही तलवार मिळावी, यासाठी अनेकवेळा आंदोलनं झाली.

मात्र आता भारतीय वंशाचे ऋषी सुनक हे पंतप्रधान झाल्याने त्यांच्याशी बोलणी सुरु झाली आहे. राज्य सरकारने केंद्रामार्फत जगदंबा तलवार महाराष्ट्राला देण्याची मागणी केल्याचं मंत्री सुधीर मुनगंटीवार यांनी सांगितलं.