फडणवीसांनी वडिलांना दिलेला शब्द पाळला ; सदाभाऊंनी सांगितली आठवण

जमिनीचे तापमान कमी करण्यासाठी शेतकऱ्यांना सोबत घेण्याची भूमिका विरोधी पक्षनेते देवेंद्र फडणवीस (Devendra Fadnavis)यांनी घेतली. त्यामुळेच गावागावात वनसमिती स्थापन झाली. बांध असेल तेथे झाडे लावण्याचा कार्यक्रम हाती घेतला आणि जलयुक्त शिवार योजना आली असल्याचे रयत क्रांती संघटनेचे अध्यक्ष, आमदार सदाभाऊ खोत (SadaBhau Khot) यांनी विधानसभेत सांगितले. यावेळी त्यांनी एक किस्सा सांगत फडणवीसांचे कौतुक केले.

जलयुक्त शिवार योजने संदर्भात बोलताना सदाभाऊ म्हणाले, फडणवीसांनासोबत शेतकऱ्यांच्या प्रश्नावर काम करताना अधिक सखोलपणे, अभ्यासपूर्ण काम केले. यातून जमिनीच्या तापमान वाढीचा प्रश्न समोर आला. हे काम करत असताना वाढत्या तापमानाला रोखण्याचे प्लॅनिंग फडणवीसांनी केले. जमिनीचे तापमान कमी करायचे असेल तर पाण्याची पातळी वाढवावी लागेल असा निष्कर्ष समोर आला. यातून गावोगावी झाडे लावण्याचा उपक्रम हाती घेतल्याची माहिती त्यांनी दिली.

सदाभाऊ खोत यांनी विधानसभेत वडिल आणि फडणवीसांच्या भेटीचा प्रसंग सांगितला. ते म्हणाले, वडिलांना कॅन्सर उपचारासाठी लिलावत हाॅस्पिटलला अॅडमिट केले होते. आॅपरेशन झाल्यानंतर देवेंद्र फडणवीस हे भेटायला आले. त्यांनी वडिलांचा हातात हात घेऊन एक दिवस सदाभाऊला मंत्री करणार असल्याचे सांगितले. व त्याप्रमाणे फडणवीसांनी मंत्री केले. याचा सार्थ अभिमान असल्याचेही सदाभाऊंनी सांगितले.

सदाभाऊ खोत यांची फेसबुक पोस्ट

शब्दाला जागणारा माणूस म्हणजे देवेंद्र फडणवीस साहेब. माणसं अनेक पाहिली पण दिलेला शब्द जपणारे, शब्दाला जागणारा नेता म्हणजे आमचे देवेंद्रजी फडणवीस. फडणवीस साहेब यांनी मला आमदार व नंतर मंत्री करून हत्तीचे बळ दिले. शेतकरी-शेतमजूर बारा बलुतेदार यांच्या प्रश्नांवर लढण्याची ताकद दिली. अशा माणसावर मी माझा जीव ओवाळून टाकले तरी ते कमी आहे.