मुख्यमंत्र्यांच्या आरोग्यावरून आरोप करणाऱ्यांच्या प्रकृतीची चिंता - राऊत

सध्या राजकीय वातावरणात सत्ताधारी आणि विरोधक यांच्यात आरोपप्रत्यारोप सुरु आहेत. मुख्यमंत्री ठाकरेंनी सर्जरीमुळे राजकीय कामांपासून विश्रांती घेतली होती. यादरम्यान, भाजपच्या अनेक नेत्यांनी मुख्यमंत्री आजारी असल्यानं बाहेर जात नसल्याचा आरोप केला होता. विरोधकांच्या या टीकेवर आता शिवसेना नेते संजय राऊत यांनी पलटवार केला आहे.

ते म्हणतात, आम्ही कुणाला टार्गेट करत नाही. ज्यांची लूट झाली ते पुरावे आणून देत आहेत. ईडीला तुम्ही खंडणीखोर बनवलं आहे. क्रिमिनल सिंडिकेट महाराष्ट्रात सुरु आहे. ते बंद केल्याशिवाय शिवसेना गप्प बसणार नाही. कुणाला अंगावर यायचं असेल त्यांनी यावं, असा इशारा त्यांनी भाजपला दिला आहे.

पुढे ते म्हणाले, मुख्यमंत्र्यांची प्रकृती उत्तम आणि ठणठणीत आहे. ते कार्यक्रमाला उपस्थित राहतात. आजारपण काय सांगून येत नाही. आरोप करणाऱ्यांच्या तब्येतीची चिंता वाटते. त्यांनी काळजी घ्यावी. त्यांच्या आरोग्यासाठी, उदंड आयुष्यासाठी प्रार्थना करतो. त्यांच्या मुलाबाळांची भरभराट होवो. तुम्ही तुमची प्रकृती सांभाळा. मुख्यमंत्र्यांची प्रकृती उत्तम आहे. राज्याचं नेतृत्व करण्यासाठी ते सक्षम आणि खंबीर आहेत, असंही संजय राऊत म्हणाले.