Andheri Byelection: शरद पवारांनी राज ठाकरेंच्या पत्रातील हवा काढून घेतली का?

Rutuja latke News: अंधेरी पूर्व पोटनिवडणुकीतून भाजपने अखेर माघार घेतली आहे. काल राज ठाकरे यांनी देवेंद्र फडणवीस यांना पत्र लिहून महाराष्ट्राच्या राजकीय परंपरेला अनुसरुन माघार घेण्याची विनंती केली होती. मात्र शरद पवारांनी राज ठाकरेंच्या पत्रातील हवा काढून घेतली का? असा प्रश्न या निमित्ताने उपस्थित होतोय.

स्व. रमेश लटके यांच्या निधनानंतर अंधेरी पूर्व विधानसभा मतदारसंघासाठी निवडणूक लागली आहे. उद्धव ठाकरे गटाकडून स्व. रमेश लटके यांच्या पत्नी ऋतुजा लटके यांना उमेदवारी दिली. तर भाजपने मुरजी पटेल यांना मैदानात उतरवलं.

काल रविवारी मनसे अध्यक्ष राज ठाकरे यांनी देवेंद्र फडणवीस यांना पत्र लिहून भाजपने अंधेरी पोटनिवडणुकीत उमेदवार देऊ नये, अशी मागणी केली होती. महाराष्ट्राच्या राजकीय, सांस्कृतिक परंपरेला अनुसरुन आणि स्व. रमेश लटके यांचे काम पाहता उमेदवार देऊ नये, असं राज ठाकरे यांनी पत्रामध्ये म्हटले. त्यानंतर भाजपच्या बैठका सुरु झाल्या.

मात्र कालच संध्याकाळी अचानक शरद पवार यांनी पत्रकार परिषद घेत भाजपने उमेदवार मागे घेण्याचं आवाहन केलं. त्यासाठी शरद पवारांनी २०१४ सालच्या बीड लोकसभा पोटनिवडणुकीची आठवण करुन दिली. त्यावेळी स्व. गोपीनाथ मुंडे यांच्या निधनानंतर राष्ट्रवादीने उमेदवार दिला नव्हता. त्यामुळे ऋतुजा लटके यांच्या विरोधात भाजपने उमेदवार देऊ नये, उमेदवारी मागे घ्यावी, असं आवाहन पवारांनी केले.

आज खरोखरच भाजपने मुरजी पटेल यांची उमेदवारी मागे घेतली. शरद पवारांनी सायंकाळी अचानक भूमिका मांडल्याने राज ठाकरे यांच्या पत्रातील हवाच निघून गेल्याचं राजकीय जाणकारांचं म्हणणं आहे. पवारांना भाजपच्या भूमिकेचा अंदाज आला होता काय? असाही प्रश्न चर्चिला जोतोय.