शिवसेना भाजपच्या युतीची घोषणा लवकरच : मुनगंटीवार

मुंबई : शिवसेना आणि भाजपमध्ये लोकसभा निवडणुकीच्या पार्श्वभूमीवर बैठकांवर बैठका सुरू आहेत. युतीबाबत शिवसेनेकडून सावध पवित्रा घेतला जात असतानाच, युतीची घोषणा लवकरच होणार असल्याचे भाजप नेते आणि अर्थमंत्री सुधीर मुनगंटीवार यांनी आज भाजप प्रदेश कार्यलयात सांगितले. 

मुनगंटीवार आणि महसूलमंत्री चंद्रकांत पाटील यांच्या प्रमुख उपस्थितीत "मन की बात, मोदी के साथ', या उपक्रमांतर्गत रथ यात्रेचा प्रारंभ करण्यात आला. या वेळी मुनगंटीवार यांनी पत्रकारांशी संवाद साधला. 

"मातोश्री' निवासस्थानी आज शिवसेनेच्या वरिष्ठ नेत्यांची तसेच आमदार आणि खासदारांची बैठक झाली. या बैठकीत आगामी निवडणूक आणि युतीबाबत ही चर्चा झाली; मात्र या बैठकीचा तपशील शिवसेनेचे प्रवक्ते आणि खासदार संजय राऊत यांनी उघड केला नाही. शिवसेना स्वबळावर लढण्यास सक्षम असून, याबाबतचा निर्णय पक्षप्रमुख उद्धव ठाकरे घेतील, असे सांगितले.

यादरम्यान, अर्थमंत्री सुधीर मुनगंटीवार यांनी, लवकरच युतीची घोषणा होईल'', असे वक्तव्य केले. प्रशांत किशोर हे एनडीएचे घटक आहेत. त्यांनी शिवसेनेला मदत केली तरी ती आम्हालाच मदत ठरणार आहे, असेही मुनगंटीवार म्हणाले.