Bhaskar Jadhav : राज्यात 8 महिन्यांत 9 ठिकाणी जातीय दंगली, या मागं भाजपचाच हात; आमदार जाधवांचा गंभीर आरोप

कोल्हापूर : ‘राज्यात गेल्या आठ महिन्यांत ९ ठिकाणी जातीय दंगली झाल्या. या मागे भारतीय जनता पक्षाचा हात असल्याचे समोर आले आहे. राजकीय स्वार्थासाठी भाजपकडून (BJP) दंगली घडवण्याची शक्यता नाकारता येत नाही. त्यामुळे सर्वांनी डोके शांत ठेवून मतदान करावे. २०२४ ला केंद्रातून आणि राज्यातून भारतीय जनता पक्षाला हद्दपार करायचे आहे,’ असे प्रतिपादन शिवसेना नेते आमदार भास्कर जाधव यांनी केले.

मुस्लिम बोर्डिंग (Muslim Boarding) येथे झालेल्या ‘होऊ दे चर्चा’ या उपक्रमात ते बोलत होते. आमदार जाधव (Bhaskar Jadhav) म्हणाले, ‘समाजात द्वेष निर्माण करून आपला राजकीय स्वार्थ साधण्याचे काम भारतीय जनता पक्षाकडून केले जात आहे. राज्यात गेल्या ८ महिन्यांत ९ दंगली झाल्या. दोन वर्षांपूर्वी माझ्या गुहागर मतदारसंघातही दंगल होणार असल्याचे भाकीत मी केले होते. त्यानंतर तेथे दंगल झाली.

त्या दंगलीमागे भाजप होता. २०२४ साली निवडणुकीत आपला टिकाव लागणार नाही हे भाजपला माहिती आहे. त्यामुळे राज्यात आणि देशात भाजपकडून दंगली घडवल्या जाण्याची दाट शक्यता आहे. त्यामुळेच सर्व धर्मीयांनी शांत राहून मतदान करून भाजपला सत्तेतून हद्दपार करावे.

सध्या आरक्षणावरून मराठा समाजाचा उद्रेक झाला आहे. याला उपमुख्यमंत्री देवेंद्र फडणवीस जबाबदार आहेत. सत्ता द्या आरक्षण देतो, असे ते म्हणाले होते. मात्र, त्यांनी आरक्षण दिले नाही. त्यांच्यामुळेच मराठा समाजाचा उद्रेक झाला आहे, असेही त्यांनी स्पष्ट केले. यावेळी बोर्डिंगचे चेअरमन गणी आजरेकर, प्रशासक कादर मलबारी, जिल्हा प्रमुख संजय पवार, विजय देवणे, रविकिरण इंगवले, सुनील मोदी, हर्षल सुर्वे यांची प्रमुख उपस्थिती होती.

अजित पवार यांची अडचण

आमदार जाधव म्हणाले, ‘सत्तेसाठी आणि मंत्रिपदासाठी अजित पवार भाजपसोबत गेले; पण आता त्यांनी घेतलेल्या निर्णयाला मुख्यमंत्री एकनाथ शिंदे स्थगिती देतात. ज्यावेळी अजित पवार आमच्यासोबत होते, त्यावेळी असे होत नव्हते. त्यामुळे अजित पवार यांची अडचण होणार आहे.