"शिवजयंतीस आम्ही दुश्मनांना..."; शिवसेनेचा दिल्लीश्वरांवर वार

छत्रपती शिवाजी महाराजांची आज तिथीनुसार जयंती आहे. शिवसेना, मनसेसह इतर अनेक संघटना आणि शिवप्रेमींकडून तिथीनुसार शिवजयंती साजरी केली जातेय. तर दुसरीकडे राज्यात राजकीय आरोप प्रत्यारोपांचा खेळ देखील सुरुच आहे. आज शिवजयंचीचं औचित्य साधून शिवसेनेचं मुखपत्र सामनामध्ये शिवाजी महाराजांवर अग्रेलेख लिहिला गेला आहे. महाराष्ट्राच्या दुश्मनांसाठी शिवचरित्र हा एक धडा आहे असं या अग्रलेखातून म्हटलं आहे. यावेळी शिवसेनेनं अप्रत्यक्षपणे विरोधकांना इशारा दिला आहे.

राज्यात मागच्या काही दिवसांपासून, सत्ताधारी महाविकास आघाडी आणि भाजप यांच्यात राजकीय चिखलफेक सुरु आहे. शिवसेनेनं आज सामनाच्या अग्रलेखातून पुन्हा एकदा भाजपवर निशाणा साधला आहे. महाराष्ट्राला झुकवणं दिल्लीश्वरांना कधी जमणार नाही, असं म्हणत सामनातून नाव न घेता भाजपवर टीका करण्यात आली आहे.

सामनामध्ये काय म्हटलंय?

"महाराष्ट्राला वाकवणे व झुकवणे दिल्लीश्वर व त्यांच्या चमच्यांना कधीच जमले नाही. शिवरायांचे राज्य श्रमिकांचे होते. त्याच श्रमिकांनी लढून मुंबईसह महाराष्ट्र मिळवला. तोच श्रमिक बाळासाहेब ठाकरे यांचा कडवट पाठीराखा बनला. महाराष्ट्र कधीच रडत बसला नाही. हीच शिवरायांची प्रेरणा. मुजरे आणि हुजरे करणाऱयांत महाराष्ट्राची गणना झाली नाही, हेच खरे शिवचरित्र. शिवाजी महाराजांनी महाराष्ट्राला शौर्य दिले, ते शौर्य आजही भवानी तलवारीसारखे धारदार व खणखणीत आहे. आजच्या शिवजयंतीस आम्ही महाराष्ट्राच्या दुश्मनांना त्याची जाणीव करून देत आहोत. महाराष्ट्राच्या दुश्मनांसाठी शिवचरित्र हा एक धडा आहे!" असं म्हणत सामानतून अप्रत्यक्षपणे केंद्रात सत्तेत असलेल्या भाजपला इशारा दिला आहे.