प्रकाश आंबेडकरांनी निवडणुकीत एक हजार कोटी घेतले; संतोष बांगर

नेहमीच वादग्रस्त वक्तव्य करणारे शिवसेना आमदार संतोष बांगर (MLA Santosh Bangar) यांनी वंचित बहुजन आघाडीचे अध्यक्ष प्रकाश आंबेडकर (Prakash Ambedkar) यांच्यावर निवडणुकीमध्ये एक हजार कोटी रुपये घेतल्याचा आरोप केला आहे. यामुळे राजकीय वातावरण तापण्याची शक्यता वर्तवण्यात येत आहे. जवळा बाजार येथील शिव संपर्क अभियान अन्तर्गत आयोजित सभेमध्ये बोलताना त्यांनी आरोप केला.

आंबेडकर यांच्यावर निशाणा साधताना बांगर म्हणाले, सर्व बौद्ध समाजाने वंचित बहुजन आघाडीला मोठ्या संख्येने मतदान केले. तिकडे प्रकाश आंबेडकर यांनी एक हजार कोटी रुपये घेतले. सभास्थानी ते हेलिकॅप्टरने पोहचतात. मग हेलिकॅप्टर आलं कुठून असा प्रश्नही त्यांनी उपस्थित केला.

शिवसेना पक्षप्रमुख उद्धव ठाकरे यांनी शिवसंपर्क अभियान राबविण्यासाठी राज्यातील सर्व शिवसेना खासदार व आमदारांची शुक्रवारी (ता.२५) बैठक घेतली. हा कार्यक्रम हिंगोली जिल्ह्यातील जवळा बाजार येथे आयोजित करण्यात आला होता. यावेळी शिवसैनिक जोडण्यासाठी आणि पक्ष विस्तार करण्यासाठी प्रत्येक जिल्ह्याला निरीक्षक नेमले. हिंगोली जिल्ह्याचे निरीक्षक म्हणून कोल्हापूर लोकसभेचे खासदार संजय मंडलिक यांची नियुक्ती करण्यात आली आहे.