शिवसेना ५० वर्ष वयोगटातील उमेदवार देणार? आदित्य ठाकरेंनी दिलं उत्तर

आगामी काळातील महानगरपालिका निवडणुकांसाठी (Municipal Corporation Election) तिकीट कुणाला मिळणार? या प्रश्नावरून मागच्या काही दिवसांत शिवसेनेच्या (Shivsena) आजी माजी नगरसेवक आणि इच्छुकांमध्ये मध्ये मोठा संभ्रम निर्माण झाला आहे. याचं कारण म्हणजे ५० पेक्षा जास्त वय असणाऱ्या उमेदवारांना तिकीट मिळणार की नाही? यावरून अनेक वेगवेगळ्या बातम्या शिवसैनिकांमध्ये पसरल्या होत्या. मात्र आता थेट युवा सेना प्रमुख आणि मंत्री आदित्य ठाकरे (Aditya Thackeray) यांनीच याबद्दल पक्षाची भुमिका स्पष्ट केली आहे.

महानगरपालिका निवडणुकांसाठी इच्छुक उमेदवारांपैकी फक्त ५० वर्षांपेक्षा वय कमी असलेल्या उमेदवारांनाच तिकीट मिळेल अशी अफवा पसरली होती. त्यानंतर आता आदित्य ठाकरे यांनी असं काहीही होणार नसल्याचं सांगितलं आहे. आदित्य ठाकरे यांच्याकडून या बातमीचं खंडन करण्यात आलंय. ते म्हणाले, "विशिष्ट वयोगटाला निवडणुकीचे तिकीट देण्याबाबत गेले २-३ दिवस मी काही बातम्या बघत आहे. या बातम्या खोट्या आहेत. शिवसेना पक्षात फक्त जनतेची अहोरात्र सेवा करणाऱ्यांनाच इतर कोणताही भेदभाव न करता तिकीट मिळतं."