सोलापूरकरांनो, रविवारी ‘हा’ मार्ग राहणार वाहतुकीसाठी बंद! वाहनांसाठी ४ पर्यायी मार्ग; पोलिस आयुक्तांचे आदेश

तात्या लांडगे

सोलापूर : लोकशाहीर अण्णा भाऊ साठे जयंतीनिमित्ताने रविवारी (ता. ३) शहरातून मिरवणूक काढली जाणार आहे. मिरवणुकीसाठी मोठी गर्दी होणार असल्याने त्या दिवशी सकाळी १० ते रात्री १२ वाजेपर्यंत मिरवणूक मार्गावरील वाहतूक दुसऱ्या मार्गाने वळविण्यात येणार आहे. पोलिस आयुक्त एम राज कुमार यांनी त्यासंबंधीचे आदेश काढले आहेत.

लोकशाहीर अण्णा भाऊ साठे चौक- रामलाल चौक- डॉ. बाबासाहेब आंबेडकर चौक- चार हुतात्मा पुतळा- सरस्वती चौक- नवीवेस पोलिस चौकी- छत्रपती शिवाजी महाराज चौक ते ॲम्बेसेडर हॉटेल हा मार्ग रविवारी वाहतुकीसाठी सकाळी १० वाजल्यापासून बंद राहणार आहे. विजयपूरकडून येणाऱ्या व त्या रस्त्याने जाणाऱ्या जड वाहनांसाठी नवीन बायपास रोडचा वापर करावा लागणार आहे.अक्कलकोटकडून येणाऱ्या जड वाहनधारकांनी नवीन अक्कलकोट नाका- शांती चौक- जुना बोरामणी नाका- मार्केट यार्ड या मार्गाचा वापर करावा. मंगळवेढ्याकडून येणाऱ्या वाहनांनी देखील बायपासचाच वापर करावा, असे आवाहन करण्यात आले आहे.

वाहनांसाठी पर्यायी मार्ग...

• (१) जुळे सोलापूरकडून मंगळवेढ्याकडे जाणाऱ्या वाहनांनी पत्रकार भवन- महावीर चौक- गुरूनानक चौक- संत तुकाराम चौक- अशोक चौक- शांती चौक- जुना बोरामणी नाका- मार्केट यार्ड- शेळगी क्रॉस रोड- जुना तुळजापूर नाका- कारंबा नाका- जुना पुना नाका- नवीन बायपासमार्गे पुढे.

• (२) मंगळवेढ्याकडून सोलापुरात येणाऱ्या वाहनांनी नवीन बायपास रोडने बाळे येथून जुना पुना नाका- कारंबा नाका- जुना तुळजापूर नाका- शेळगी क्रॉस रोड- मार्केट यार्ड- हैदराबाद रोडने पुढे.

• (३) रेल्वे स्टेशन येथून बसस्थानक, छत्रपती शिवाजी महाराज चौककडे जाणाऱ्यांनी रेल्वे स्टेशन- सात रस्ता- रंगभवन चौक- विजापूर वेस- बाकळे प्रेस कॉर्नर- भावसार पथ- समाचार चौक- कौंतम चौक- कुंभार वेस- बलिदान चौक ते पुढे.

• (४) जुना पुना नाका येथून रेल्वे स्टेशनकडे जाणाऱ्यांसाठी जुना कारंबा नाका- जुना तुळजापूर नाका- बोरामणी नाका- शांती चौक- सात रस्ता ते रेल्वे स्टेशन किंवा ॲम्बेसेडर हॉटेल- जुना पुना नाका- बाळे- केगाव बायपासमार्गे देगाव- मरीआई चौक- नागोबा मंदिर- रामवाडी दवाखाना- मोदी स्मशानभूमी- मोदी पोलिस चौकीसमोरून रेल्वे स्टेशन.