लडाखमध्ये सैन्याच्या गाडीला जबर अपघात; साताऱ्याच्या जवानाला वीरमरण

विसापूर : लडाख (Ladakh) प्रदेशात २६ सैनिकांना घेऊन जाणारे भारतीय लष्कराचे (Indian Army) वाहन श्योक नदीत पडले. या अपघातात सात जवानांचा मृत्यू झाला. त्यामध्ये विसापूर (ता. खटाव) येथील सुभेदार विजय सर्जेराव शिंदे (Subedar Vijay Shinde) यांचा समावेश आहे. देशसेवा बजावत असताना त्यांना वीरमरण आलं. या घटनेमुळं विसापूरसह खटाव तालुका (Khatav Taluka) शोकसागरात बुडाला आहे. त्यांच्या पश्चात आई, पत्नी, दोन मुली, दोन भाऊ असा परिवार आहे.

विजय सर्जेराव शिंदे हे सन १९९८ मध्ये २२ मराठा लाईट इन्फंट्रीमध्ये (Maratha Light Infantry) लष्करी सेवेत रुजू झाले होते. २४ वर्षाच्या कालावधीत त्यांनी लष्करात विविध ठिकाणी काम करून देशाचं संरक्षण केलं. विसापूर गावाला सैनिकी परंपरा आहे. विजय शिंदे यांचे वडील सर्जेराव शिंदे लष्करात होते, तर मोठे बंधू प्रमोद शिंदे हे लष्करात पॅरा कमांडो म्हणून कार्यरत आहेत.

सध्या विजय शिंदे यांचे पोस्टिंग लेह-लडाख येथे होते. लष्करात ते सुभेदार या पदावर कार्यरत होते. २६ जवानांचे परतापूरच्या संक्रमण शिबिरातून उपसेक्टर हनिफच्या फॉरवर्डकडे जात असताना लष्कराचे वाहन रस्त्यावरून घसरून श्योक नदीत आज सकाळी ९ वाजताच्या सुमारास पडले. या अपघातात सात सैनिकांचा मृत्यू झाला आणि सोळा जण जखमी झाले असल्याची माहिती मिळत आहे. त्याच अपघातात सुभेदार विजय शिंदे यांना वीरमरण आले. दरम्यान, विजय शिंदे यांचे पार्थिव रविवार दि. २९ मे रोजी विसापूर (ता. खटाव) येथे आणले जाणार आहे. तिथेच शासकीय इतमामात त्यांच्यावर ती अंत्यसंस्कार होणार आहेत.