"आम्ही ६० वर्षांत जे केलं तेच विकून तुम्ही सरकार चालवताय"; मोदींना टोला

राष्ट्रवादी काँग्रेसच्या खासदार सुप्रिया सुळे यांनी पंतप्रधान नरेंद्र मोदींवर जोरदार निशाणा साधला आहे. महागाई आणि महिलांच्या प्रश्नांवर सुप्रिया सुळे बोलत होत्या. यावेळी त्यांनी सिलेंडरच्या वाढलेल्या किमतींवरून पंतप्रधान मोदींना सुनावलं आहे. परभरणीतल्या बालविवाह प्रतिबंध जागृती अभियान महिला परिषद आणि कार्यकर्ता मेळाव्यात त्या बोलत होत्या. (Supriya Sule slams PM Narendra Modi over inflation)

महागाईवरून मोदींवर टीका करताना सुप्रिया सुळे(NCP MP Supriya Sule) म्हणाल्या, "गरीबांना मोफत सिलेंडर देतो सांगून इतरांची सबसिडी काढून घेतली. ना गरिबांना सिलेंडर दिलं, ना इतरांना. महिलांना मोदींच्या धोरणामुळे पुन्हा चुलीकडे वळावं लागलंय. यांचा फोटो पेट्रोल पंपावर असतो. पण यांना फक्त जाहिरातबाजी करता येते. मोदींना (PM Narendra Modi) मला स्वर्गीय सुषमा स्वराज यांची आठवण करून द्यायची आहे. त्या जेव्हा विरोधी पक्षात होत्या, तेव्हा सिलेंडर ४०० रुपये होता. आता हजारांच्या वर सिलेंडरची किंमत गेलीये. याचं भान त्यांना आहे का?"

सुप्रिया सुळे पुढे म्हणाल्या, "पंतप्रधान मोदी एवढ्या संस्था विकतायत आणि आम्हाला विचारतायत की ६० वर्षांत आम्ही काय केलं. आम्ही जे ६० वर्षांत केलं तेच विकून तुम्ही सरकार चालवत आहात. राज्यातले भाजपा (Maharashtra BJP) नेते उठसूट आमच्यावर टीका करतायत, त्यांना दुसरं कामच राहिलेलं नाही. त्यांनी एक लक्षात ठेवावं, त्यांच्याकडे जे १०५ आमदार आहेत, ते राष्ट्रवादीतूनच गेलेले आहेत."