आज मिळणार का जामीन? आर्यन खानच्या जामीनावर आज पुन्हा सुनावणी

मुंबई: क्रूज ड्रग्ज प्रकरणी आज मुंबई हायकोर्टात पुन्हा सुनावणी होणार आहे. गेल्या 19 दिवसांपासून बॉलिवूड अभिनेता शहारुख खानचा मुलगा आर्यन खान एनसीबीच्या कस्टडीत आहे. क्रूज ड्रग्स पार्टी प्रकरणी अटकेत असणाऱ्या आर्यन खानला काल मंगळवारी देखील जामीन मिळाला नाही.

हायकोर्टामध्ये त्याच्या जामीन अर्जावर आज बुधवारी देखील सुनावणी जारी राहिल. आर्यन खानची बाजू मांडताना माजी अॅटर्नी जनरल मुकूल रोहतगी यांनी युक्तीवाद केला की, आर्यन खानच्या विरोधात कोणताही ठोस पुरावा एनसीबीकडे नाहीये. त्यांच्याकडून कसलेही ड्रग्स प्राप्त झालेले नाहीयेत तरीही कोणतीही ठोस साक्ष उपलब्ध नसताना त्याला 20 दिवसांपर्यंत तुरुंगात ठेवणं योग्य नाहीये.

आर्यन खानची अटक ही चुकीच्या पद्धतीने केली गेली असल्याचा दावा त्याचे वकिल मुकूल रोहतगी आणि सतीश मानशिंदे यांनी केला. त्याचा या सगळ्या प्रकरणाशी कसलाही संबंध नसून एनसीबीजवळ कसलाही ठोस पुरावा नाहीये की तो ड्रग्सचे सेवन करतो, असा युक्तीवाद त्यांनी केला होता. यावेळी एनसीबीने कोर्टात सांगितलं की, आर्यन फक्त ड्रग्स घेतच नाही तर त्याची अवैध रित्या तस्करी देखील करण्यामध्ये त्याचा सहभाग आहे.

आर्यन खानसह अरबाज मर्चंट आणि मुनमुन धामेचा यांचे जामीन अर्ज मुंबई सत्र न्यायालयानं फेटाळले आहेत. गेल्या आठवड्यात बुधवारी विशेष एनडीपीएस कोर्टानं त्याचा जामीन अर्ज फेटाळला होता. त्यानंतर त्यांच्या वकिलांनी तात्काळ मुंबई उच्च न्यायालयात विशेष एनडीपीएस कोर्टाच्या निर्णयाला आव्हान देणारी याचिका दाखल केली आहे. या याचिकेवर उच्च न्यायालयात बुधवारी (आज) सुनावणी पार पडणार आहे.