विधानपरिषद सभापतींनी बैठक घेऊनही ‘प्रश्न जैसे थे’! विद्यापीठाची ५५ कोटींचे प्रशासकीय भवन तयार, अहिल्यादेवींचे स्मारकही अंतिम टप्प्यात, पण जायला रस्ताच नाही

तात्या लांडगे

सोलापूर : पुण्यश्लोक अहिल्यादेवी होळकर सोलापूर विद्यापीठाची हिरज रोडवरील ४८२ एकर परिसरात ५५ कोटींची प्रशासकीय इमारत बांधून तयार झाली आहे. विद्यापीठासमोर १४ कोटी ८२ लाखांचे अहिल्यादेवींचे स्मारक उभारले जात आहे. याशिवाय २० कोटींचे इनडोअर स्टेडिअम देखील बांधले जात आहे. मात्र, त्याठिकाणी जायला पक्का रस्ताच नाही. विधानपरिषदेचे सभापती प्रा. राम शिंदे यांनी बैठक घेऊनही रस्त्याचा विषय प्रलंबितच आहे.

विधानपरिषदेचे सभापती प्रा. राम शिंदे यांनी विद्यापीठाच्या प्रश्नासंदर्भात ८ एप्रिल रोजी बैठक घेतली होती. त्यावेळी प्रा. शिंदे यांनी संबंधित विभागांना आदेश देत तातडीने कार्यवाही करून त्याचा अहवाल सादर करण्यास सांगितले होते. साडेतीन महिने झाले, तरीदेखील कोंडी ते नवीन प्रशासकीय भवन या सव्वा किलोमीटर रस्त्याचा प्रश्न निकाली निघालेला नाही. कोंडीच्या उड्डाणपुलापासून सव्वा किमी रस्ता व्हावा अशी विद्यापीठाची मागणी आहे. त्यासाठी भूसंपादन करावे लागणार असून वन खात्याचीही परवानगी आवश्यक आहे. हा रस्ता झाल्यावर विद्यार्थ्यांना थेट नवीन प्रशासकीय इमारतीकडे जाता येणार आहे. त्यासाठी कुलगुरू डॉ. प्रकाश महानवर यांनी विधानपरिषदेच्या सभापतींकडे पाठपुरावा केला. सभापतींनी बैठकही घेतली, पण अजूनही त्यावर मार्ग निघालेला नाही.

जिल्हा नियोजनकडून निधी, पण वर्क ऑर्डर नाही

हिरज रोडवरून विद्यापीठाच्या नव्या प्रशासकीय भवन व पुण्यश्लोक अहिल्यादेवी होळकर यांच्या स्मारकाकडे जाण्यासाठी डांबरी रस्ता नाही. त्यासाठी पालकमंत्री जयकुमार गोरे यांनी जिल्हा नियोजन समितीतून निधी मंजूर केला आहे. मात्र, त्याची वर्क ऑर्डर अद्याप निघालेली नाही. त्यामुळे तो रस्ता झाला नसल्याची खंत विद्यापीठातील अधिकाऱ्यांनी बोलून दाखविली.

विद्यापीठाच्या जमिनीवर टप्प्याटप्प्याने ‘वन’ आरक्षण

नव्या प्रशासकीय भवनाच्या परिसरात स्टेडिअम, वसतीगृहे बांधण्यासाठी सलग जमीन आवश्यक आहे. मात्र, विद्यापीठाच्या मालकीच्या ४८२ एकर जमिनीपैकी २७२ एकरावर वन विभागाचे आरक्षण आहे. त्यात माळढोक, जंगल आणि इकोसेन्सेटिव्ह झोन, अशा तीन प्रकारचे आरक्षण आहे. सलग जमिनीवर नाही तर तुटक- तुटक (टप्प्याटप्प्याने) ते आरक्षण असल्याने स्वत:च्या मालकीची जागा असून ती वापरता येत नाही, अशी सद्य:स्थिती आहे.