Urfi Javed : उर्फी जावेद मुस्लिम असल्याने भाजपकडून टार्गेट...तृप्ती देसाई अ‍ॅक्शन मोडमध्ये

मॉडेल उर्फी जावेद आणि भाजप नेत्या चित्रा वाघ यांच्यातील वाद दिवसेंदिवस वाढताना दिसून येत आहे. उर्फी जावेदने काही दिवसांपूर्वी या प्रकरणी महिला आयोगाच्या अध्यक्षा रुपाली चाकणकर यांची भेट घेतली होती. त्यानंतर चित्रा वाघ यांनी उर्फीवर टीका केली. तिने काहीही करावं. कुठेही जावं. पण नीट कपडे घालून जावं, असं चित्रा वाघ यांनी म्हटलं. त्यानंतर काल उर्फी जावेदची पोलिसांकडून चौकशी करण्यात आली आहे.

आता या वादामध्ये भूमाता ब्रिगेडच्या नेत्या तृप्ती देसाई यांनी उडी घेत उर्फी जावेदला पाठिंबा दिला आहे. उर्फी जावेद मुस्लिम असल्यामुळेच तिला भाजपकडून टार्गेट केलं जातंय का? हे तपासलं पाहिजे. तसं असेल तर आम्ही तिच्या पाठीशी उभं राहू, असं तृप्ती देसाई यांनी म्हटलं आहे.

हे ही वाचा : आर्थिक निर्णय घेताना बनू नका चिंतातूर जंतू....

उर्फी जावेदला पोलिसांनी दोन दिवसांपूर्वी नोटीस बजावली त्यानंतर काल तिची पोलिसांकडून सखोल चौकशी करण्यात आली. यासंबधी प्रतिक्रिया देताना तृप्ती देसाई म्हणाल्या की, आपला देश संविधानानुसार चालतो. उर्फीने काय कपडे घालावे आणि काय घालू नये हा तिचा प्रश्न आहे. या आधी अनेक अभिनेत्रींनी बोल्ड कपडे घातले आहेत असंही त्या म्हणाल्या आहेत.

त्यावेळी कोणी काही प्रश्न विचारले नाही. पण उर्फी जावेदलाच भाजप का टार्गेट करत आहे?; असा सवाल करतानाच उर्फी केवळ मुस्लिम असल्याने भाजप तिला टार्गेट करत आहे का? हे आपण तपासलं पाहिजे, असं तृप्ती देसाई म्हणाले.