‘आयडॉल’साठी प्रवेशाची पुन्हा संधी

मुंबई - विविध राज्यांत झालेल्या अतिवृष्टीमुळे पदवी अभ्यासक्रमांचे प्रवेश घेण्यात विद्यार्थ्यांना अडचणी आल्या होत्या. या पार्श्‍वभूमीवर विद्यापीठांनी केलेल्या मागणीनंतर विद्यापीठ अनुदान आयोगाने (यूजीसी) प्रवेश घेण्याची मुदत वाढविण्याचा निर्णय घेतला आहे. त्यानुसार मुंबई विद्यापीठाच्या दूर व मुक्त अध्ययन संस्थेच्या (आयडॉल) सर्व वर्गांच्या प्रवेशासाठी २० सप्टेंबरपर्यंत मुदतवाढ देण्यात आली आहे.  

यूजीसीने आयडॉलच्या जुलै सत्रासाठी ३१ ऑगस्टपर्यंत प्रवेशाची मुदत दिली होती; मात्र विविध राज्यांत झालेल्या अतिवृष्टीमुळे अनेक विद्यार्थी प्रवेश घेऊ शकले नव्हते. या पार्श्‍वभूमीवर यूजीसीने ११ सप्टेंबरला परिपत्रक प्रसिद्ध करून प्रवेशाची मुदत वाढवली. आयडॉलच्या बीए, बीकॉम व बीएस्सी आयटी, एमए, एमए शिक्षणशास्त्र, एमकॉम, एमए व एमएस्सी गणित, एमएस्सी आयटी, एमसीए, पीजीडीएफएम व पीजीडीओआरएम या अभ्यासक्रमांसाठी विद्यार्थ्यांना २० सप्टेंबरपर्यंत ऑनलाइन प्रवेश घेता येणार आहे. प्रवेश शुल्कही ऑनलाइन पद्धतीने भरावयाचे आहे. हे अर्ज http://idoloa.digitaluniversity.ac या संकेतस्थळावरून करता येतील.