मनसेच्या 'हनुमान चालिसा' मोहिमेबद्दल विश्व हिंदू परिषदेनं स्पष्टच सांगितलं!

महाराष्ट्र नवनिर्माण सेनेने ३ मे रोजी मशिदींवरील भोंगे हटवले नाहीत, तर हनुमान चालिसा लावू असा इशारा दिला होता. या मनसेच्या कार्यक्रमात विश्व हिंदू परिषद आणि बजरंग दलाचे कार्यकर्तेही सहभागी होणार अशा बातम्या येत होत्या. मात्र या केवळ अफवा असल्याचं विश्व हिंदू परिषदेने स्पष्ट केलं आहे.

मनसेचं हे प्रोपगंडाचं राजकारण असल्याची टीका विश्व हिंदू परिषदेने केली आहे. तसंच विश्व हिंदू परिषद अशा कोणत्याही राजकीय कार्यक्रमाला किंवा राजकीय पक्षाला कोणत्याही प्रकारचा पाठिंबा देणार नाही, त्यांच्या कार्यक्रमात सहभागी होणार नाही, असं स्पष्ट केलं.

विश्व हिंदू परिषद असो किंवा बजरंग दल कोणीही मनसेच्या हनुमान चालिसा कार्यक्रमाला पाठिंबा दिलेला नाही. याबद्दल येणाऱ्या बातम्या बोगस आणि निराधार आहेत, अशी माहिती विश्व हिंदू परिषदेचे राष्ट्रीय प्रवक्ते विनोद बन्सल यांनी दिली. विश्व हिंदू परिषद ही अराजकीय संघटना आहे, ती कोणत्याही राजकीय पक्षाला पाठिंबा देत नाही, असंही त्यांनी सांगितलं.