महाराष्ट्राला दृष्ट लावण्याचं काम काही भोंगेबाज करताहेत; काँग्रेसच्या बड्या नेत्याची भाजप-मनसेवर टीका | Sakal
sakal

बोलून बातमी शोधा

Vijay Wadettiwar

'जो महाराष्ट्र शांत होता, त्याला दृष्ट लावण्याचं काम काही भोंगबाज करत आहेत.'

'महाराष्ट्राला दृष्ट लावण्याचं काम काही भोंगेबाज करताहेत'

कऱ्हाड (सातारा) : जो महाराष्ट्र शांत होता, त्याला दृष्ट लावण्याचं काम काही भोंगबाज करत आहेत. त्यांना काहीच काम नसल्यानं ते भोंगे वाजत आहेत. धर्मा-धर्मांत भांडणं लावून स्वतःची पोळी भाजण्याचं काम काही जणांकडून सुरु आहे. त्यात काही मृत्यू झाले तर टाळूवरील लोणी खाण्यासाठी काही डोम कावळे टपले आहेत. ते महाराष्ट्राला उद्ध्वस्त करु पाहत आहेत, त्यापासून ओबीसी समाजानं दूर रहावं, असा टोला मंत्री विजय वडेट्टीवर (Vijay Wadettiwar) यांनी आज येथे भाजप (BJP) आणि मनसेला (MNS) नाव न घेता लगावला.

सातारा जिल्ह्यातील ओबीसी समाजाच्या (OBC Community) मेळाव्यात ते बोलत होते. माजी मुख्यमंत्री आमदार पृथ्वीराज चव्हाण (Prithviraj Chavan), ओबीसीचे प्रदेशाध्यक्ष भानुदास माळी, काँग्रेसचे प्रदेश सरचिटणीस अ‍ॅड. उदयसिंह पाटील, जिल्हाध्यक्ष डॉ. सुरेश जाधव, युवक प्रदेश उपाध्यक्ष शिवराज मोरे, दक्षिण काँग्रेस अध्यक्ष मनोहर शिंदे, मलकापूर नगराध्यक्षा निलम येडगे आदी उपस्थित होते. मंत्री वडेट्टीवार पुढे म्हणाले, मनसेचे अध्यक्ष राज ठाकरे यांची भूमिका ही त्यांच्या मुखातून कोणीतरी वदवून घेत आहे, हे स्पष्ट झालंय. धार्मिक तेढ निर्माण करुन राजकारणात स्वतःला जे काय मिळवायचं आहे ते भाजप मिळवत आलं आहे. त्यातून त्यांना पक्ष मजबूत होईल, असं वाटत आहे.

हेही वाचा: 'ईडी, भोंगा, हनुमान चालिसाच्या माध्यमातून सरकार पाडण्याचा भाजपचा प्रयत्न'

महापालिका, स्थानिक स्वराज्य संस्थांच्या निवडणुका महाविकास आघाडीच्या माध्यमातून लढवल्या जातील का? याबाबत संभ्रम निर्माण झाला आहे. मुंबई किंवा इतर महापालिकांच्या निवडणुकासंदर्भात पक्षाचे वरिष्ठ नेते, प्रदेशाध्यक्ष जो काय निर्णय घेतील तो निर्णय अंतिम होईल. त्यानंतर आम्ही कॉंग्रेस पक्षाची भूमिका स्पष्ट करु, असंही वडेट्टीवर यांनी सांगितलं.

Web Title: Vijay Wadettiwar Criticism Of Bjp And Mns

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top