Watch Video: "घरात बसून कोणाचे चांगले होणार नाही," कॅलिफोर्नियातील 83 वर्षीय आजींनी मतदानासाठी थेट गाठली बारामती

सध्या देशभरात लोकसभा निवडणुका सुरू आहेत. या निवडणुका एकूण सात टप्प्यांमध्ये होणार असून, यातील तिसरा टप्पा काल, मंगळवारी पार पडला. यामध्ये महाराष्ट्रातील 11 जागांचा समावेश होता.

निवडणुकीसाठी झालेल्या पहिल्या तिन्ही टप्प्यांमध्ये मतदान कराण्यासाठी लोकांमध्ये अनुत्सुकता दिसत आहे. तसेच गेल्या निवडणुकीच्या तुलनेत मतदानाची टक्केवारीही घसरल्याचे पहायला मिळत आहे.

एकिकडे निवडणूक आयोग मतदानाची टक्केवारी वाढवण्यासाठी प्रयत्न करत असताना बारामती लोकसभा मतदारसंघातून एक दिलासादायक बातमी समोर येत आहे.

येथे एका 83 वर्षीय आजींनी मतदान करण्यासाठी अमेरिकेतील कॅलिफोर्नियातून थेट बारामती गाठात आपला मतदानाचा हक्क बजावला.

लोकसभा निवडणुकीसाठीच्या तिसऱ्या टप्प्यात महाराष्ट्रातील 11 जागांवर मतदान पार पडले. या 11 जागांमध्ये बारामती लोकसभा मतदारसंघाचीह समावेश होता. येथे शरद पवार आणि अजित पवार यांच्यातील लढतीमुळे याकडे संपूर्ण देशाचे लक्ष लागले आहे.

अत्यंत चुरशीच्या होत असलेल्या या निवडणुकीत मतदान करण्यासाठी अनिता कोठाडिया या 83 वर्षांच्या आजी अमेरिकेतील कॅलिफोर्नियातून बारामतीला आल्या होत्या.

पीटीआय या वृत्तसंस्थेशी बोलताना अनिता कोठाडिया म्हणाल्या, "मी खास मतदान करण्यासाठी अमेरिकेतून बारामतीला आली आहे. मी आतापर्यंत एकही निवडणूक चुकवली नाही, प्रत्येक वेळी मतदान करुन माझी जबाबदारी पार पडली आहे."

यावेळी अनिता कोठाडिया यांनी सर्वांना मतदान करण्याचे आवाहन केले. त्या म्हणाल्या,"तुम्ही घरात बसू नका जरा आजूबाजूल पाहा आणि मतदान करून सहकार्य करा. घरात बसून कोणाचे चांगले होणार नाही. त्यामुळे तुम्ही बाहेर पडा आणि मतदान करा."

दरम्यान, बारामतीमध्ये शरद पवार यांच्या नेतृत्त्वाखालील राष्ट्रवादीकडून विद्यमान खासदार सुप्रिया सुळे मैदानात आहेत. तर उपमुख्यमंत्री अजित पवार यांच्या नेतृत्त्वाखाली राष्ट्रावादीने सुनेत्रा पवार यांना संधी दिली आहे.

राष्ट्रवारी काँग्रेस पक्ष फुटल्यानंतर पहिल्यांदाच बारमतीमध्ये मोठी निवडणूक होत आहे. त्यामुळे येथे कोण बाजी मारणार याकडे संपूर्ण राज्याचे लक्ष लागले आहे.