Weather Update : राज्यात एकीकडे अवकाळीचा कहर, तर दुसरीकडे उष्णतेचा अलर्ट; हवामान विभागाचा काय आहे अंदाज?

राज्याच्या अनेक भागामध्ये अवकाळी पावसाने हजेरी लावली आहे. अनेक भागात गारपीट झाली असून शेती पिकांचं मोठ्या प्रमाणात नुकसान झालं आहे. तर दुसरीकडे काही जिल्ह्यांमध्ये उष्णतेचा कहर दिसून येत आहे. आज राज्यात संमिश्र वातावरण असण्याची शक्यता आहे. काही जिल्ह्यांमध्ये तीव्र उष्णतेची लाट झाली आहे. काही ठिकाणी पाऊस हजेरी लावणार आहे. यासाठी आज अनेक जिल्ह्यांमध्ये हवामान विभागाने यलो अलर्ट जारी केला आहे.

कोकण, मध्य महाराष्ट्र, मराठवाडा आणि विदर्भाच्या काही जिल्ह्यांमध्ये वादळी वाऱ्यासह (30-40 किमी प्रतितास वेग) हलक्या ते मध्यम पावसाची शक्यता आहे. तर दुसरीकडे मुंबई आणि ठाण्यात आज दिवसभर उष्णतेची लाट असेल तर संध्याकाळच्या सुमारास हलक्या पावसाचा अंदाज वर्तवण्यात आला असून यलो अलर्ट जारी करण्यात आला आहे. रायगड, रत्नागिरी, जळगाव, नाशिक, सोलापूर आणि बीडमध्ये उष्णतेच्या लाटेचा इशारा देण्यात आला आहे.

दरम्यान, नांदेड, लातूर, धाराशिव या जिल्ह्यांमध्येही आज वादळी वारा आणि विजांच्या कडकडाटासह हलक्या पावसाचा अंदाज वर्तवण्यात आला आहे. या जिल्ह्यांनाही यलो अलर्ट जारी करण्यात आला आहे.

पुणे शहर परिसरात पावसाने लावली हजेरी

दिवसभर प्रचंड उकाडा आणि सायंकाळी वादळी वाऱ्यासह मध्यम स्वरूपाच्या पावसाने जिल्ह्यात बहुतेक ठिकाणी हजेरी लावली. सलग दुसऱ्या दिवशी शहराच्या पूर्व भागासह बारामती, इंदापूर, हवेली, शिरूर, दौंड आदी तालुक्यांत वादळी वाऱ्यासह ढगांच्या गडगडाटात अवकाळी पाऊस कोसळला. पुढील दोन दिवस संपूर्ण जिल्ह्यात उकाड्यासह अवकाळी पावसाची शक्यता हवामान खात्याने वर्तवली आहे.

वादळी पावसाच्या हजेरीबरोबरच जिल्ह्यातील कमाल तापमान पुन्हा वाढले आहे. अनेक ठिकाणी पारा ४१ अंशांच्या पार गेला आहे. तळेगाव ढमढेरे येथे सर्वाधिक म्हणजे ४३.१ अंश सेल्सिअस तापमान होते. पुणे शहरातील सरासरी कमाल तापमान ३९ अंश सेल्सिअस नोंदविले गेले. बुधवारी दुपारी अचानक आकाश ढगाळ होत सायंकाळी वादळी वाऱ्यासह पावसाने हजेरी लावली.

जिल्ह्याच्या पूर्व भागात रात्री उशिरापर्यंत अवकाळी पावसाचे ढग दाटले होते. अनेक ठिकाणी जोरदार पाऊस आणि वादळी वाऱ्यामुळे नुकसानीची शक्यता आहे. बाष्पयुक्त हवा आणि वाढलेल्या तापमानामुळे गुरुवारी (ता. १८) जिल्ह्यात दुपारनंतर आकाश अंशतः ढगाळ आणि अनेक ठिकाणी वादळी वाऱ्यासह मध्यम स्वरूपाच्या पावसाची शक्यता हवमान खात्याने दिली आहे. राज्यात कोकण, मध्य महाराष्ट्र, मराठवाड्यात उष्ण लाटेचा (यलो अलर्ट) इशारा, मराठवाड्यात विजांसह पावसाचा इशारा (येलो अलर्ट) देण्यात आला आहे.

इंदापुरातही मुसळधार

सायंकाळी बारामती तालुक्यावर ढगांनी गर्दी केली होती. त्यानंतर वादळी वाऱ्यासह मुसळधार पावसाने हजेरी लावली होती. लगतच्या इंदापूर, फलटण, कर्जत आदी तालुक्यांतही वादळी पाऊस कोसळला. रात्री उशिरापर्यंत पावसाची हजेरी कायम होती. रात्री साडेनऊपर्यंत मिळालेल्या आकडेवारीनुसार बारामतीत सरासरी २०.५ मिलिमीटर पर्जन्यमानाची नोंद झाली.

जिल्ह्यातील अवकाळी पाऊस (मिलिमीटर)

वडगावशेरी ः १६

हवेली ः १

बारामती ः २०.५

पाषाण ः ०.५