Weather Update : वेस्टर्न डिस्टर्बन्समुळे 'या' भागात पावसासह गारपीटीची शक्यता! काही भागात गारठा वाढला, वाचा हवामान विभागाचा अंदाज

Weather Update : राज्याच्या अनेक भागामध्ये पावसाने हजेरी लावली आहे. अनेक भागात अवकाळी पाऊस आणि गारपिटीमुळे शेती पिकांचं मोठ्या प्रमाणावर नुकसान झालं आहे. अशातच हवामान विभागाने वर्तवलेल्या अंदाजानुसार वेस्टर्न डिस्टर्बन्सच्या प्रभावामुळे महाराष्ट्रासह, दिल्ली, पूर्व मध्य प्रदेश, उत्तर तामिळनाडू, पश्चिम बंगाल आणि सिक्कीम या राज्यांमध्ये पुढील एक-दोन दिवसांत मुसळधार पावसासह गारपीटीची शक्यता आहे. यामुळे पुन्हा एकदा शेतकऱ्यांच्या चिंतेत वाढ झाली आहे.

पर्वतीय भागांमध्ये हिमवृष्टी होत असल्यामुळे उत्तरेकडून थंड वारे राज्याच्या दिशेनं येत आहेत. परिणामी मराठवाडा आणि विदर्भातील अनेक जिल्ह्यांमध्ये ढगाळ वातावरण तयार झालं आहे. येत्या ४८ तासांत राज्याला पुन्हा एकदा अवकाळी पावसाचा इशारा हवामान खात्याने दिला आहे.

भारतीय हवामान विभागाने वर्तवलेल्या अंदाजानुसार, बुलढाणा, अकोला, अमरावती, वर्धा, गोंदिया आणि भंडारा जिल्ह्यात जोरदार पावसाची शक्यता आहे. तर, मराठवाड्यातील छत्रपती संभाजीनगर, जालना, बीड, परभणीसह अन्य जिल्ह्यांमध्ये तुरळक ठिकाणी पावसाची शक्यता आहे.

त्याचबरोबर काही भागांमध्ये वादळी वाऱ्यासह गारपीट देखील होण्याची शक्यता आहे. तर मुंबई, नवी मुंबई आणि पश्चिम महाराष्ट्रात उन्हाचा तडाखा वाढला आहे. रविवारी संध्याकाळनंतर वातावरणात प्रचंड गारवा निर्माण झाला. तर कर्नाटक राज्यात तीव्र उष्णता जाणवत आहे.

दरम्यान, राज्यात झालेल्या पावसामुळे आणि गारपिटीमुळे शेती पिकांसह फळबागांचं मोठं नुकसान झालं आहे. गहू, बाजरी, लिंबू, द्राक्ष, टरबूज पिकाचं मोठ्या प्रमाणात नुकसान झालं आहे. यामुळे शेतकऱ्यांची चिंता वाढली आहे.