तात्या लांडगे
सोलापूर : अत्याचारातील पीडित मुली, तरुणी, बालके व महिलांना शासनाच्या मनोधैर्य योजनेतून आर्थिक मदत आणि समुपदेशनातून मानसिक आधार दिला जातो. सोलापूर जिल्ह्यातील ९९ अत्याचार पीडितांना मागील साडेचार वर्षात ‘मनोधैर्य’मधून तब्बल एक कोटी ११ लाख रुपयांची मदत देण्यात आली आहे.
एका अवचित क्षणी नराधमांच्या लैंगिक अत्याचाराने उन्मळून पडलेल्या ‘ती’ला मनोधैर्य योजनेतून उभारण्यासाठी जिल्हा विधी सेवा प्राधिकरणाच्या माध्यमातून मदत मिळवून दिली जाते. अचानकपणे समोरील नराधमाने केलेल्या अत्याचारामुळे अडचणीत सापडलेल्या पीडितांना आधार देण्याचे काम प्राधिकरणाकडून केले जाते. तिला न्याय मिळवून देण्यासाठी देखील प्राधिकरणाकडून मोफत कायदेशीर मदत केली जाते.
यंदा जिल्ह्यातील पाच पीडितांना साडेपाच लाख रुपयांचे अर्थसाहाय्य या योजनेतून मिळाले आहे. जिल्ह्यातील ग्रामीण भागातील या पीडिता असून, त्यांच्यावर नराधमांनी जबरदस्तीने अत्याचार केलेला आहे.
काय आहे मनोधैर्य योजना?
लैंगिक अत्याचार, ॲसिड हल्ला, लैंगिक अत्याचाराचे बळी, ज्वालागृही पदार्थांमुळे जखमी अशा पीडितांना उदरनिर्वाहासाठी मदत व्हावी म्हणून राज्य सरकारने २ ऑक्टोबर २०१३ पासून मनोधैर्य योजना सुरू केली. या योजनेतून पीडितांना तीन ते दहा लाखांपर्यंत मदत करून त्यांचे पुनर्वसन करण्याचा प्रयत्न केला जातो. याशिवाय पीडितेला मोफत वैद्यकीय उपचार व कायदेशीर मदत देखील दिली जाते. मदतीसाठी पीडितेने जिल्हा विधी सेवा प्राधिकरणाकडे अर्ज करणे अपेक्षित आहे. अर्ज प्राप्त झाल्यापासून सात दिवसांत पीडितेला मदत दिली जाते. काही रक्कम लगेचच आणि उर्वरित रक्कम बॅंकेत ठेव म्हणून ठेवली जाते.
जिल्हा प्राधिकरणाकडून लोकोपयोगी काम
अत्याचार पीडितांना जलद न्याय मिळावा, यासाठी जिल्हा विधी सेवा प्राधिकरणाच्या माध्यमातून पीडितांना मोफत कायदेशीर मदत दिली जाते. मनोधैर्य योजनेतून आर्थिक मदत, त्यांचे समुपदेशन, कौटुंबिक वाद, नात्यातील वितुष्ट दूर करण्यातही प्राधिकरणाचे मोठे काम आहे. प्रमुख जिल्हा व सत्र न्यायाधीश मनोज शर्मा, प्राधिकरणाचे सचिव मल्हार शिंदे यांच्या नेतृत्वात प्राधिकरणाचे काम सुरू आहे.
- ॲड. देवयानी किणगी, सहायक लोकअभिरक्षक, जिल्हा विधी सेवा प्राधिकरण, सोलापूर
मनोधैर्य योजनेतील आकडेवारी...
वर्ष पीडिता मदतीची रक्कम
२०२१ ६ ६.६५ लाख
२०२२ १२ ११.०२ लाख
२०२३ ५६ ६३.१० लाख
२०२४ २० २४.६० लाख
२०२५ ५ ५.५५ लाख
एकूण ९९ १.११ कोटी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.