अभिनेता शर्मन जोशीच्या वडिलांचे निधन  

मुंबई - प्रख्यात अभिनेता शर्मन जोशी  याचे वडिल अरविंद जोशी यांचे शुक्रवारी सकाळी वार्धक्यानं निधन झाले. ते 84 वर्षांचे होते. त्यांना मुंबईतील नानावटी रुग्णालयात दाखल करण्यात आले होते. त्यांच्या जाण्यानं शर्मनवर दु;खाचा डोंगर कोसळला आहे. बॉलीवूडमधील अनेक कलाकारांनी त्याचे सांत्वन केले आहे. त्यांच्या जाण्यानं भारतीय रंगभूमीचे मोठे नुकसान झाले आहे.

सर्वप्रथम ज्येष्ठ अभिनेते परेश रावल यांनी ट्विट करत अरविंद यांच्या निधनाची माहिती दिली. ‘भारतीय रंगभूमीचे खूप मोठे नुकसान झाले आहे. मला सांगताना दु:ख होत आहे की, अभिनेते अरविंद जोशी यांचे निधन झाले आहे,’ असं म्हणत त्यांनी  त्यांना श्रध्दांजली वाहिली.  अरविंद जोशी यांनी गुजरातीमधील अनेक हिट चित्रपटांमध्ये तसेच नाटकांमध्ये काम केले होते.

गुजराती नाटकांमधून त्यांनी स्वतःची ओळख निर्माण केली. गुजरातीसह हिंदी चित्रपटसृष्टीमध्येही त्यांनी काम केलं. इत्तेफाक , शोले,  अपमान की आग, खरीदार’, ठिकाना, नाम अशा अनेक चित्रपटांमध्ये त्यांनी सहकलाकार म्हणून काम करताना वेगळा ठसा उमटविला होता. त्यांनी हिंदी मालिकांमध्येही काम केले आहे.