Ashok Saraf: अशोक मामांना पहिला सिनेमा कसा मिळाला ? जाणून घ्या किस्सा

Ashok Saraf Maharashtra Bhushan News: ज्येष्ठ मराठी चित्रपट आणि नाट्य अभिनेते अशोक सराफ यांना कला क्षेत्रातील भरीव योगदानासाठी २०२३ वर्षाचा मानाचा 'महाराष्ट्र भूषण' पुरस्कार देण्याची घोषणा मुख्यमंत्री एकनाथ शिंदे यांनी केली आहे.

अशोक सराफ यांनी केवळ विनोदीच नव्हे तर गंभीर स्वरूपापासून ते खलनायकी प्रवृत्तीपर्यंत विविध छ्टांचे दर्शन आपल्या अभिनयातून घडवले. वयाची ७५ ओलांडली तरीही अशोक सराफ आजही विविध माध्यमांमधून लोकांचं मनोरंजन करत आहेत. मनोरंजन विश्व गाजवणाऱ्या अशोक मामा यांना पहिला सिनेमा कसा मिळाला? जाणून घ्या.

असा मिळाला अशोक सराफ यांना पहिला सिनेमा

अशोक सराफ यांना अभिनयाची आवज होती. ते सुरुवातीच्या काळात रंगभूमीवर सक्रीय होते. अशातच रंगभूमीवर काम करताना अशोक मामांना स्टेट बँकेच्या नोकरीची ऑफर आली.

पुढे बँकेत नोकरी करतानाही अशोक मामांनी नाटकं आणि रंगभूमीची साथ सोडली नाही. आंतरबँक एकांकिका स्पर्धेत भाग घेऊन त्यांनी पहिलं पारितोषिक पटकावलं. पुढे अशोकमामा नोकरी सांभाळत सांभाळत नाटकं करु लागले.

पुढे एका नाटकासाठी प्रकाशयोजनेची जबाबदारी सांभाळत असताना गजानन जहागीरदार यांनी 'दोन्ही घरचा पाहुणा' सिनेमासाठी अशोकमामांची निवड केली.

अशाप्रकारे अशोक सराफ यांना आयुष्यातला पहिला सिनेमा मिळाला. त्यावेळी सात दिवसांच्या कामासाठी मामांना ५०० रुपये मिळाले होते.

महाराष्ट्र भूषण मिळाल्यावर अशोक मामांची प्रतिक्रिया

अशोक मामांनी महाराष्ट्र भूषण जाहीर झाल्यावर ABP माझा ला प्रतिक्रिया दिली. अशोक सराफ म्हणाले, "मला कल्पना नव्हती मला हा पुरस्कार मिळेल. मी कुठेतरी चांगलं काम करतोय. माझी आतापर्यंतची धडपड सार्थकी लागली. मी करत गेलो आणि लोकांना आवडत गेलं. हे यश माझं नाही तर माझ्या सहकाऱ्यांचंही आहे. या यशात निवेदिता माझ्यासोबत होती."