गोणीत आढळला अभिनेत्रीचा मृतदेह; पतीने दिली हत्येची कबुली

ढाक्याच्या केरानीगंज परिसरातील एका पुलाजवळ गोणीत एका महिलेचा मृतदेह आढळला आहे. हा मृतदेह बांगलादेशी (Bangladesh) अभिनेत्री रायमा इस्लाम शिमू (Raima Islam Shimu) हिचा असल्याची धक्कादायक माहिती समोर आली आहे. सोमवारी सकाळी काही स्थानिकांनी अलीपूर पुलाजवळ मृतदेह आढळल्याची माहिती पोलिसांना दिली. मृतदेहावर अनेक जखमांच्या खुणा असल्याने अभिनेत्रीची निर्घृण हत्या करण्यात आल्याचं समजतंय. कलाबागन पोलीस ठाण्यात हरवल्याची तक्रार दाखल करणारा रायमाचा पती शाखावत अली नोबल आणि त्याच्या चालकाला पोलिसांनी चौकशीसाठी ताब्यात घेतलं. चौकशीदरम्यान रायमाच्या पतीने गुन्ह्याची कबुली दिली. मात्र रायमाची हत्या का केली, यामागचं कारण अद्याप स्पष्ट झालेलं नाही.

रायमाचा पती शाखावत अलीला तीन दिवसांची कोठडी सुनावली आहे. दरम्यान, पोलिसांनी मृतदेह शवविच्छेदनासाठी पाठवला असून अहवालाची वाट पाहत आहेत. बांगलादेशी माध्यमांमधील काही वृत्तांमध्ये या प्रकरणात अभिनेत्याचा सहभाग असल्याचं म्हटलं आहे. परंतु पोलिसांनी अद्याप यासंबंधी कोणतीही माहिती उघड केली नाही.

रायमा ही बांगलादेशी चित्रपट आणि टीव्ही इंडस्ट्रीतील लोकप्रिय अभिनेत्री होती. तिने १९९८ मध्ये 'बार्तमन'मधून अभिनय क्षेत्रात पदार्पण केलं आणि तेव्हापासून तिने २५ चित्रपट आणि काही टीव्ही शोमध्ये काम केलं आहे.