मराठीमध्ये सातत्याने वेगळे आणि वास्तववादी विषय हाताळले जातात. दिग्दर्शक सचिन वाघ यांनीही एक अत्यंत संवेदनशील विषय ‘भागीरथी मिसिंग’ या चित्रपटातून प्रेक्षकांच्या भेटीला आणला आहे.
सस्पेन्स थ्रीलर असलेला हा चित्रपट ८ मार्च रोजी प्रेक्षकांच्या भेटीला येणार आहे. ‘सह्याद्री मोशन पिक्चर्स’ निर्मित, प्रमोद कुलकर्णी प्रस्तुत आणि सचिन वाघ दिग्दर्शित ‘भागीरथी मिसिंग’चा ट्रेलर नुकताच प्रदर्शित करण्यात आला. निर्माता-दिग्दर्शक सचिन वाघ म्हणाले की, प्रेक्षक चित्रपटगृहात येतात ते करमणुकीसाठी.
त्यामुळे चित्रपट तयार करताना करमणुकीला प्राधान्य दिले गेले आहे. बेपत्ता झालेल्या एका महिलेचा शोध घेताना तिचे पूर्व आयुष्य उलगडत जाते. हा प्रवास संगीतमय करण्याचा प्रयत्न आम्ही केला आहे. सध्या एकूणच महिलांवरील अत्याचार आणि मुलींचे बेपत्ता होण्याचे प्रमाण वाढलेले आहे.
त्यामुळे आम्ही करमणुकीसोबतच हा विषयसुद्धा मांडण्याचा प्रयत्न केला आहे. चित्रपटाचे शीर्षक ‘भागीरथी मिसिंग’ या नावामुळे या प्रश्नाच्या गांभीर्याविषयी जर लोकजागृती झाली तर मला नक्कीच आनंद वाटेल. या चित्रपटात अभिनेत्री शिल्पा ठाकरे, सुरेश विश्वकर्मा, अभिषेक अवचट, चंद्रकांत मुळगुंदकर, संदीप कुलकर्णी आणि पूजा पवार यांच्या प्रमुख भूमिका आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.