Bigg Boss Marathi 3: मीरा जगन्नाथ घराबाहेर; टॉप ५ स्पर्धकांमध्ये चुरस

बिग बॉस मराठीच्या (Bigg Boss Marathi 3) इतिहासात पहिल्यांदात आठवड्याच्या मधल्या दिवसांत स्पर्धकाचं एलिमिनेशन करण्यात आलं आणि ती स्पर्धक ठरली मीरा जगन्नाथ. बिग बॉस मराठीचं तिसरं सिझन अंतिम टप्प्यात आलं असून येत्या २६ डिसेंबर रोजी ग्रँड फिनाले पार पडणार आहे. त्यामुळे ग्रँड फिनालेपूर्वी घरातील सहा स्पर्धकांपैकी एकाचं एलिमिनेशन होणार होतं. विशाल निकमने 'तिकिट टू फिनाले'चं टास्क जिंकत ग्रँड फिनालेमध्ये आपली जागा पक्की केली. त्यामुळे त्याच्या व्यतिरिक्त पाच जणांपैकी एक जण घर सोडून जाणार होतं. यामध्ये विकास पाटील, जय दुधाणे, मीनल शाह, उत्कर्ष शिंदे आणि मीरा जगन्नाथ यांचा समावेश होता. बिग बॉस मराठी ३च्या पहिल्या एपिसोडपासून सर्वाधिक चर्चेत राहिलेल्या मीराचा प्रवास अखेर ग्रँड फिनालेच्या आधीच संपला. (Mira Jagannath Eliminated)

बिग बॉसने पाचही स्पर्धकांना गार्डन एरियामध्ये बोलावलं होतं. गार्डनमधील एका पटावर पाच जणांना उभं राहायला सांगितलं. अखेर मीरा एलिमिनेट झाल्याचं बिग बॉसने घोषित केलं. त्यामुळे विशाल, विकास, जय, उत्कर्ष आणि मीनल हे पाच स्पर्धक ग्रँड फिनालेमध्ये पोहोचले आहेत. या पाच जणांपैकी बिग बॉस मराठी ३चा विजेता कोण ठरणार हे पाहणं औत्सुक्याचं ठरणार आहे.

'माझ्या नवऱ्याची बायको' या मालिकेतून मीराने छोट्या पडद्यावर पदार्पण केलं. यामध्ये तिने संजनाची भूमिका साकारली होती. त्यानंतर 'येऊ कशी तशी मी नांदायला' या मालिकेत मोमोची भूमिका साकारत ती घराघरात पोहोचली. या भूमिकेमुळे तिला सर्वाधिक प्रसिद्धी मिळाली. बिग बॉसच्या घरात गेल्यापासून मीराचं अनेकांसोबत भांडण झालं. सूत्रसंचालक महेश मांजरेकर यांनीसुद्धा तिला चावडीवर अनेकदा सुनावलं होतं.