DCM Ajit Pawar: महात्मा फुलेंच्या विचारांचे प्रतीक असलेली पगडी, उपमुख्यमंत्र्यांनी पाहिला 'सत्यशोधक'

DCM Ajit Pawar Satyashodhak Movie: महात्मा फुलेंच्या आयुष्यावर आधारित 'सत्यशोधक' सिनेमाची सर्वांना उत्सुकता आहे. हा सिनेमा उद्या ५ जानेवारीला सगळीकडे रिलीज होणार आहे. सत्यशोधक सिनेमाची टीम सध्या विविध राजकीय व्यक्तींना भेटून सिनेमाचं प्रमोशन करत आहे.

अशातच 'सत्यशोधक' सिनेमाची टीम महाराष्ट्राचे उपमुख्यमंत्री अजित पवार यांना भेटली आहे. त्याचे फोटो सोशल मीडियावर चांगलेच व्हायरल झाले आहेत.

अजित पवार यांची सत्यशोधक टीमने घेतली भेट

राज्याचे उपमुख्यमंत्री मा. श्री अजितदादा पवार यांच्या प्रमुख उपस्थितीत 'सत्यशोधक' सिनेमाचे स्पेशल स्क्रिनिंग पार पडले. यावेळी महात्मा ज्योतीराव फुले यांच्या समतेच्या विचारांची प्रतीक असलेली पगडी अजितदादांना देण्यात आली.
यावेळी सिनेमात महात्मा फुले आणि सावित्रीबाई फुले यांची भूमिका साकारणारे कलाकार संदीप कुलकर्णी आणि राजश्री देशपांडे उपस्थित होते.

सत्यशोधक सिनेमाला रिलीजआधीच अनेक पुरस्कार

‘विद्येविना मती गेली, मतिविना निती गेली...’ अशा कठोर शब्दांत शिक्षणाचे महत्त्व सांगणाऱ्या म‌. ज्योतिरावांच्या आयुष्यातील संघर्ष आता मोठ्या पडद्यावर पहिल्यांदाच साकारणार आहे. अभिनेते संदीप कुलकर्णींसह राजश्री देशपांडे, गणेश यादव, सुरेश विश्वकर्मा, रविंद्र मंकणी ही कलाकार मंडळी चित्रपटात झळकतील.

या चित्रपटाला आंतरराष्ट्रीय स्तरावर अनेक पुरस्कारांनी गौरविण्यात आले आहे. इंग्लंडमधील पेन्झान्स इंटरनॅशनल फिल्म फेस्टिव्हलमध्ये सर्वोत्कृष्ट बायोग्राफीकल फिचर फिल्म या पुरस्काराने तर, जर्मनीत होहे इंटरनॅशनल फिल्म फेस्टिव्हलमध्ये द्वितीय सर्वोत्कृष्ट दिग्दर्शकाचा सन्मान या चित्रपटाला मिळाला.

सत्यशोधक सिनेमाची उत्सुकता

समता फिल्म्स निर्मित, अभिता फिल्म्स प्रॉडक्शन प्रा. लि. प्रस्तुत आणि निलेश जळमकर लिखित-दिग्दर्शित सत्यशोधक सिनेमा आधी १० नोव्हेंबरला रिलीज होणार होता. आता सिनेमाची रिलीज डेट बदलली आहे.

रिलायन्स एंटरटेंनमेंट मार्फत ‘सत्यशोधक’ हा चित्रपट ५ जानेवारी, २०२४ रोजी प्रदर्शित होणार आहे.