Kiran mane: "घड्याळवाला अमरीशपुरी, धनुष्यबाणवाला प्रेमचोपडा आणि..."; किरण मानेंच्या पोस्टनं वेधलं लक्ष

Kiran mane: लोकसभा निवडणुकीच्या (Loksabha Election) तारखा काल निवडणूक आयोगाने जाहीर केल्या. यंदा महाराष्ट्रामध्ये पाच टप्प्यांमध्ये निवडणूक प्रक्रिया पार पडणार आहे. 19 एप्रिल, 26 एप्रिल, 7 मे, 13 मे आणि 20 मे या तारखांना मतदान होणार आहे तर 4 जून रोजी लोकसभा निवडणुकांचा निकाल जाहीर होणार आहे. लोकसभा निवडणुकांच्या तारखांबाबत नुकतीच अभिनेते किरण माने (Kiran mane) यांनी एक पोस्ट शेअर केली आहे. त्यांच्या या पोस्टनं अनेकांचे लक्ष वेधले आहे.

किरण माने यांची पोस्ट

किरण माने यांनी नुकतीच त्यांच्या फेसबुक अकाऊंटवरून एक पोस्ट शेअर केली आहे. या पोस्टमध्ये त्यांनी लोकसभा निवडणुकीबद्दल लिहिलं आहे. या पोस्टमध्ये किरण मानेंनी लिहिलं, "महाराष्ट्रात पाच टप्प्यात निवडणूक... पण गुजरातमध्ये एकाच टप्प्यात? का?? घे की एकाच टप्प्यात हिकडंबी मर्दा. घड्याळवाला अमरीशपुरी, धनुष्यबाणवाला प्रेमचोपडा आणि तुमचा स्वत:चा कवठ्या महांकाळ असतानाबी हिंमत होईना व्हय? हे बरोबर नाय राव.हा न्याय नाही, अन्याय आहे!" किरण मानेंच्या या पोस्टवर अनेक नेटकऱ्यांनी कमेंट्स केल्या आहेत.

किरण माने यांनी चित्रपट आणि मालिकांमध्ये केलं काम

रावरंभा,स्वराज्य (2011) आणि अपहरण (2005), टकाटक-2 (2022) या चित्रपटांमध्ये किरण माने यांनी काम केलं. काही दिवसांपू्र्वी त्यांनी ठाकरे गटात प्रवेश केला. त्यांच्या राजकारणातील एन्ट्रीची सोशल मीडियावर बरीच चर्चा देखील झाली. मराठी बिग बॉसमुळे किरण मानेंना विशेष लोकप्रियता मिळाली.

'मुलगी झाली हो' या मालिकेत देखील किरण माने यांनी काम केलं. या मालिकेतून त्यांना काढण्यात आल्यानं मोठी कॉन्ट्रॉव्हर्सी निर्माण झाली होती. दिव्या पुगावकर,योगेश सोहोनी,शर्वणी पिल्लई या कलाकारांनी देखील 'मुलगी झाली हो' या मालिकेत प्रमुख भूमिका साकारली होती.

सोशल मीडियावरील पोस्टमुळे असतात चर्चेत

किरण माने हे त्यांच्या सोशल मीडियावरील पोस्टमुळे चर्चेत असतात. काही दिवसांपूर्वी किरण माने यांनी 'मुलगी झाली हो' या मालिकेचा उल्लेख करत एक पोस्ट शेअर केली होती. या पोस्टमध्ये किरण माने यांनी प्राजक्ता केळकर आणि श्वेता आंबीकर यांच्यासोबतचा फोटो शेअर केला होता.

या फोटोला त्यांनी कॅप्शन दिलं होतं, "'मुलगी झाली हो' च्या वेळी माझ्यावर खोट्या आरोपांच्या फैरी झडत असताना... अचानक स्वत:च्या करीयरची पर्वा न करता माझ्या पाठीशी भक्कमपणे उभ्या राहीलेल्या या माझ्या जिगरी मैत्रीणी !"