Kiran Mane: कुनाचा बाप तुझी घोडदौड रोखू शकनार नाय.. TDM रिलीज होताच किरण माने रोखठोक भिडले..

Kiran Mane: आज मराठी मनोरंजन विश्वातील मोठा दिवस आहे. ज्या चित्रपटासाठी पुण्यामध्ये ट्रॅक्टर मोर्चा काढण्यात आला, तो ग्रामीण माणसांचं प्रतिनिधित्व करणारा 'TDM' (टिडीएम) चित्रपट आज पुन्हा प्रदर्शित झाला आहे.

हा चित्रपट गेल्या महिन्यात 28 एप्रिल रोजी प्रदर्शित झाला होता. परंतु त्याच वेळी प्रदर्शित झालेल्या ',महाराष्ट्र शाहीर' या चित्रपटाचा फटका TDM ला बसला आणि थिएटर मिळत नसल्याने चित्रपट मागे घ्यावा लागला.

त्यावेळी चित्रपटाचे कलाकार, दिग्दर्शक भाऊराव कऱ्हाडे अक्षरशः धायमोकलून रडले होते. पण त्यावेळी त्यांनी हा चित्रपट पुन्हा प्रदर्शित करू अशी घोषणा केली. आणि अखेर आज हा चित्रपट प्रदर्शित झाला आहे.

ग्रामीण भागात या चित्रपटाला तूफान प्रतिसाद मिळत असून, अभिनेते किरण माने यांनी या संदर्भात एक पोस्ट लिहिली आहे.

(Kiran Mane shared post for TDM marathi movie and director bhaurao karhade )

किरण माने यांनी लिहिले आहे की, ''...भाऊराव कर्‍हाडे, कितीबी झालं तरी तू शेतकर्‍याचा पोरगा हायेस. संकट आस्मानी असूदे नायतर सुलतानी, तू मागं नाय हटनार ! कर्ज काढून मोठ्या आशेनं स्वप्नांची पेरनी केलीवतीस. पन अचानक अवकाळीनं घात केला. बियानं कुजून गेलं. तुला लै वेदना झाल्या...''

''पुन्हा स्वत:ला सावरून तू एक पाऊल मागं घेतलंस. दुबार पेरनी करायची हिंमत दाखवलीस, इथंच आमची मनं जिंकलीस. त्यानंतर तुझा मला फोन आलावता तवाबी तुला सांगीतलंवतं, आजबी सांगतो... आता कुनाचा बाप तुझी घोडदौड रोखू शकनार नाय. लढ तू. ''

पुढे किरण माने यांनी लिहिलं आहे की, ''भुई कितीबी कठीन असली तरी ती भेदून तुझ्या सृजनाचं पिक तरारून वर येनार... खळं धान्यानं भरभरून वहानार...ग्रामीण मातीशी नाळ असलेला प्रत्येक प्रेक्षक 'टीडीएम' बघनार... तुझा पिच्चर सुप्परडुप्पर हिट्ट होनार !आज दुबार रिलीज होणार्‍या 'टीडीएम' साठी लै लै लै मनभरून शुभेच्छा, भाऊराव !'' अशा शब्दात किरण माने यांनी आपल्या भावना व्यक्त केल्या आहेत.

'TDM'बाबत झालेलं राजकारण पाहून पुण्यामध्ये हा चित्रपट प्रदर्शित करण्यासाठी शेतकऱ्यांनी मोर्चा काढला होता. आज अखेर हा चित्रपट प्रदर्शित झाला असून प्रेक्षकांचा सकारात्मक प्रतिसाद मिळत आहे.