Parineeti Raghav Chadha: परिणीती चोप्रा, राघव चढ्ढा यांचा साखरपुडा संपन्न; पाहा सोहळ्याचे फोटो

Parineeti Chopra Raghav Chadha Engagement : बॉलिवूड अभिनेत्री परिणीती चोप्रा आणि आम आदमी पार्टीचे खासदार राघव चढ्ढ यांचा साखरपुडा अर्थात एंगेजमेंट सोहळा आज पार पडला. या सोहळ्याला बॉलिवूडसह राजकीय क्षेत्रातील अनेक दिग्गज मान्यवरांनी हजेरी लावली. एंगेजमेंट सोहळ्यानंतर परिणीतीनं इन्स्टाग्रामवर दोघांचे फोटो शेअर केले आहेत. (Parineeti Chopra Raghav Chadha got Engageed at Delhi Kapurthala house)

गेल्या अनेक दिवसांपासून हे जोडपं चर्चेत होतं. अनेक ठिकाणी हे दोघ एकत्र दिसल्यानं आणि पापाराझींच्या कॅमेरॅत ही जोडी कैद झाल्यानं त्यांच्यामधील नात्याची चर्चा सुरु झाली होती. पण सुरुवातीला दोघांकडूनही याबाबत मौन बाळगण्यात आलं होतं. पण अखेर आज या चर्चेला पूर्णविराम मिळाला.

केजरीवाल, मान यांनी लावली हजेरी

दरम्यान, या साखरपुड्याच्या सोहळ्याला परिणीतीची बहिण प्रियंका चोप्रानं देखील हजेरी लावली. ग्लॅमरस लूकमध्ये कारमधून तिचं सोहळास्थळी आगमन झाल्यानं तिनं सर्वांचं लक्ष वेधून घेतलं होतं. त्याचबरोबर बॉलिवूडचे प्रसिद्ध फॅशन डिझायनर मनिष मल्होत्रा यांनी देखील या सोहळ्याला हजेरी लावली. या सोहळ्याला एकूण १५० पाहुणे हजरे लावणार असल्याचं सांगितलं जात आहे. दोघांचे कुटुंबीय काही जवळचे मित्र-मैत्रिणी यांचा यामध्ये समावेश आहे. विशेष म्हणजे आम आदमी पार्टीचे समन्वय आणि दिल्लीचे मुख्यमंत्री अरविंद केजरीवाल आणि पंजाबचे मुख्यमंत्री भगवंत मान यांनी देखील या सोहळ्याला हजेरी लावली.

याच वर्षी उडणार लग्नाचा बार

परिणीती चोप्रा आणि राघव चढ्ढा हे यापूर्वी एअरपोर्ट आणि इतर सार्वजनिक ठिकाणी एकत्र दिसल्यानं त्यांच्याबाबत चर्चा तर सुरु होत्याच. पण आज त्यांचा साखरपुडा संपन्न झाल्यानं ते एकमेकांना डेट करत असल्याचंही उघड झालं आहे. आजच्या एंगेजमेंट सोहळ्यांनतर आता याच वर्षी ऑक्टोबर महिन्यात ते लग्नबंधनातही अडकतील असं सांगण्यात येत आहे.