Shaitaan Trailer : 'फक्त १५ मिनिटं थांबा माझ्या फोनची बॅटरी संपलीये'! पण त्यानंतर...'शैतान'चा ट्रेलर पाहिल्यावर तुम्हीही घाबराल

Shaitan Trailer: अजय देवगण अन् आर माधवनच्या शैतान नावाच्या चित्रपटाची पहिली झलक काही दिवसांपूर्वी समोर आली होती. त्यानंतर आता या चित्रपटाचा ट्रेलर समोर आला असून त्यावरील नेटकऱ्यांच्या प्रतिक्रिया भन्नाट आहेत. बऱ्याच दिवसांपासून चाहत्यांना या चित्रपटाच्या ट्रेलरचे वेध लागले होते.

अजय देवगण, ज्योतिका आणि आर माधवन यांच्या या चित्रपटामध्ये महत्वाच्या भूमिका आहेत. आर माधवनचा नुकताच व्हायरल झालेला लूक हा त्या चित्रपटाविषयी खूप काही सांगून जाणारा होता. त्यातील त्याची भूमिका व्हिलनच्या रुपातील असून या चित्रपटाच्या निमित्तानं मॅडी वेगळ्याच भूमिकेतून आपल्या समोर येणार आहे. अजयनं त्याच्या या चित्रपटाविषयी सोशल मीडियावर पोस्ट केली होती.

पूर्वी टीझर आणि आता ट्रेलर याला चाहत्यांचा मोठा प्रतिसाद मिळाल्याचे दिसून आले असून या चित्रपटाला येत्या काळात प्रेक्षकांची मोठी पसंती मिळणार असल्याचे सांगण्यात येत आहे.शैतानच्या ट्रेलरची सुरुवात एका घरापासून होते. ज्या घरात एक व्यक्ती बसला आहे. एक मुलगी आपल्या वडिलांना सांगते आहे की, आपल्या घरात कुणीतरी आलेलं आहे. आणि तो घराबाहेर जात नाहीये.

त्या घरात दुसरं तिसरं कुणी नसून आर माधवन आहे. तो अजय देवगण आणि ज्योतिकाच्या घरी आला आहे. तो त्या घरातून जायला तयार नाही. तो म्हणतो मला केवळ पंधरा मिनिटं थांबू द्या. माझ्या फोनची बॅटरी डेड आहे. त्यानंतर जे घडतं ते भयानक असल्याचा अंदाज नेटकऱ्यांनी ट्रेलर पाहिल्यावर वर्तवला आहे.

या चित्रपटामध्ये आर माधवननं जी भूमिका केली आहे ती एका राक्षसाची आहे. जो कुणालाही आपल्याकडील शक्तीनं वश करुन घेऊ शकतो. हा चित्रपट येत्या ८ मार्च पासून थिएटमध्ये प्रेक्षकांना पाहता येणार आहे. मात्र या सगळ्यात त्याच्या ट्रेलरला मिळालेला प्रतिसाद मोठा असल्याचे दिसून आले आहे.