Vijay Antony: "तिच्यासोबत मीही मेलो.." 16 वर्षीय मुलीच्या आत्महत्येनंतर विजय अँटोनी दुःखात, पोस्ट वाचून पाणावतील डोळे

Vijay Antony Breaks Silence On Daughter Death: साउथ अभिनेता आणि निर्माता विजय अँटोनीची 16 वर्षीय मुलगी मीराने 19 सप्टेंबरला पहाटे आत्महत्या केली. मीराही राहत्या घरी लटकलेल्या अवस्थेत सापडली होती. मीरा ही तणावात होती आणि तिच्यावर उपचार सुरु होते असे सांगण्यात येत आहे.

मीरावर बुधवारी चेन्नई येथे अंत्यसंस्कार करण्यात आले. मुलीच्या मृत्यूने विजयसोबत त्यांच्या संपूर्ण कुटुंबावर दुःखाचा डोंगर कोसळला आहे. मुलीच्या मृत्यूनंतर विजयने आता त्यांच्या सोशल मीडिया हँडलवर लाडक्या लेकीसाठी अतिशय भावनिक नोट लिहिली आहे.

विजय अँटोनीने एक्सवर एक भावनिक नोट शेयर केली. यात तो लिहितो की, 'माझी लाडकी लेक मीरा.. सर्वात दयाळू आणि धाडसी होती. पंथ, जात, धर्म, पैसा, मत्सर, वेदना, दारिद्र्य किंवा वाईट जग तिने सोडले आहे. ती आता शांततेने भरलेल्या ठिकाणी गेली आहे. असं मला वाटतं. ती अजूनही माझ्याशी बोलते आहे.

ती मेली तेव्हा तिच्यासोबत माझा देखील मृत्यू झाला आहे. आता मी तिच्यासोबत वेळ घालवायला सुरुवात केली आहे. मी काही तिच्या नावाने काही चांगले काम सुरू करणार आहे. मला विश्वास आहे की हे सर्व त्याच्याकडूनच सुरू होईल.'

विजयची मुलगी मीरा ही चेन्नईतील एका खाजगी शाळेत शिकत होती. ती उत्तम बालकलाकार होती त्याचबरोबर शाळेच्या सांस्कृतिक विभागाची प्रमुख देखील होती. तिच्या आकस्मिक निधनाने सर्वांनाच धक्का बसला आहे. असं काय कारण होत की मीराला आपलं आयुष्य संपवण्याचा निर्णय घ्यावा लागला याचा पोलिस शोध घेत आहेत.