जिद्दीला सलाम! आजोबांनी ९२ व्या वर्षी कोरोनावर केली मात

पैठण (जि.औरंगाबाद) : जगण्याची तीव्र इच्छा, डॉक्टरांचे परिश्रम आणि कुटुंबाने दिलेल्या हिमतीच्या बळावर नव्वदी पार केलेल्या ९२ वर्षीय आजोबाने कोरोनाला हद्दपार केले. कोंडिराम दशरथ मिटकर (रा. यशवंतनगर, पैठण) असे या आजोबांचे नाव आहे. मिटकर हे कुटुंब पैठण येथील रहिवासी असुन या कुटुंबातील २६ सदस्य आहेत. या सर्वांना सर्दी, खोकला व ताप आल्यामुळे त्यांना कोरोनाची चाचणी करण्याचे डॉक्टरांकडून सांगण्यात आले असता केलेले कोरोना चाचणीत कुटुंबातील १३ जणांचा कोरोना रिपोर्ट पॉझिटिव्ह आला. त्यात आजोबा ही पॉझिटिव्ह हे आले.

'पूर्णपणे लॉकडाऊनला पाठिंबा, मात्र इतरांना सूट दिल्यास उद्यापासून दुकाने उघडणार'

घरातील धडधाकट मंडळींनी कोरोनाचा त्रास सहन करुन उपचार सुरु केले. परंतु त्यांना मोठी काळजी लागली ती त्यांच्या ९३ वर्षाच्या आजोबांची. आता आजोबांचे कसे होईल. उपचाराने ते लवकर बरे होतील का? असे नानाविध प्रश्न घरातील मुलगा, सुना व नातवंडाना भेडसावु लागले. त्यामुळे घरातील सगळेच जण अक्षरशः घाबरुन गेले होते. यानंतर नातेवाईकांनी पैठण येथील डॉ. संदीप शिरवत यांच्या मार्गदर्शनाखाली आजोबांना विलास बापू प्रतिष्ठानच्या रुग्णवाहिकेने उपचारासाठी तालुका शेवगाव येथील एका खासगी रुग्णालयात दाखल केले.

‘ब्रेक द चेन’मुळे कापड व्यवसाय संकटात, निर्बंधांमुळे लग्नसराईतील चैन संपली

आजोबांनी तेथे सात दिवस राहुन उपचार घेतले व त्यात ते बरे ही झाले. डॉ. कृष्णा देहाडराय डॉ. विकास बेडके यांनी उपचार केले. विशेष बाब म्हणजे घरातील १२ सदस्य अजून ही उपचार घेत असून त्यांच्या अगोदर नव्वदी पार केलेल्या आजोबांनी कोरोनाला हद्दपार केले. त्यामुळे वयोवृद्ध आजोबाच्या या धाडसाची सर्वत्र चर्चा होत असुन कौतुक होत आहे. 
 

संपादन - गणेश पिटेकर