....अन् कामगारांच्या चेहऱ्यावर आनंद दिसू लागला 

नांदेड : आयटक प्रणित वीडी कामगार संघटनेने केलेल्या पाठपुराव्यानंतर सामाजिक अंतराच्या नियमांचे पालन करीत मजूर व कोंबडा वीडी उद्योगांनी आपापल्या कामगारांचे वेतन वाटप सुरु केले आहे. कोरोनाच्या पार्श्वभूमीवर देशभरात अचानक लॉकडाऊन जाहीर झाल्याने अनेक क्षेत्रातील कामगारांचे बेहाल झाले आहेत. हातावर पोट असणाऱ्या असंघटीत कामगारांना केलेल्या कामाचेही वेतन मिळत नव्हते. यात कामगारांना वेतन मिळाल्याने त्यांच्या चेहऱ्यावर आनंद दिसू लागला. 

जिल्ह्यात तीन-चार हजार कामगार
नांदेड जिल्ह्यात वीडी उद्योगात अंदाजे तीन-चार हजार कामगार काम करतात. एकट्या नांदेड शहरात मजूर, कोंबडा आदी उद्योगात हजारो कामगार कार्यरत आहेत. एक हजार वीडी वळल्यानंतर त्यांना १७० रुपये एवढी अत्यल्प मजुरी मिळते. अचानक लॉकडाऊन सुरु झाल्याने या कामगारांनी केलेल्या कामाचे वेतन मालकांकडे थकीत होते. या क्षेत्रातील ८० टक्के कामगारांच्या उदरनिर्वाहाचे मुख्य साधन हा वीडी उद्योगच असल्याने त्यावरच त्यांच्या कुटुंबियांचा उदरनिर्वाह अवलंबून आहे.

हेही वाचा.......तर भारतही लवकरच कोरोनामुक्त होईल ! कोण म्हणाले वाचा

लॉकडाउनमुळे रोजगार बुडाला
ता. १९ मार्च नंतर जमावबंदी, लॉकडाऊन घोषीत झाल्याने या कामगारांचा रोजगार बुडाला. त्यासोबत केलेल्या कामाचेही वेतन मिळेनासे झाले. त्यामुळे कामगारांवर आर्थिक संकटाची कुऱ्हाड कोसळली होती. जिल्हा प्रशासनाच्यावतीने बऱ्याच कामगार वस्त्यांमध्ये गुरुद्वारा अथवा सामाजिक, राजकीय, स्वयंसेवी संस्था मार्फत जेवन, अन्नधान्य पुरवठा होत आहे. मात्र औषध गोळ्या, दवाखाना सारख्या इतर जीवनावश्यक वस्तु नगदी स्वरुपात खरेदी कराव्या लागत असल्यामुळे कामगार आर्थिक अडचणीत आले होते. या कामगारांनी केलेल्या कामाची मजुरी व अतिरिक्त आर्थिक सहाय्य करावे, अशी मागणी जिल्हा प्रशासन, मालक व कामगार विभागाकडे आयटक प्रणित इंडस्ट्रीयल वर्कर्स युनियनच्यावतीने सातत्याने करण्यात आली होती. 

हेही वाचलेच पाहिजे.....‘कोरोना’च्या सावटाखालील लग्नाची अशी ही गोष्ट...!

कामगारांच्या चेहऱ्यावर आनंद दिसू लागला
कामगार विभागाने सोशल डिस्टीन्सींगचा नियम पाळत कामगारांचे वेतन मालकांनी अदा करावे, अशा सुचना सहाय्यक कामगार आयुक्त सय्यद मोहसीन यांनी मालकांना दिल्या होत्या. त्यानुसार मागील दोन दिवसांपासून मजूर, कोंबडा वीडी उद्योगाने तीन-चार कामगारांना बोलवून किंवा त्यांच्या वस्त्यांमध्ये कर्मचाऱ्यांना सकाळी सात ते अकरा या वेळेत पाठवून कामगारांना वेतन वाटप सुरु केले आहे. त्यामुळे कामगारांच्या चेहऱ्यावर आनंद दिसू लागला आहे. दोन्ही व्यवस्थापनाने एकही कामगार थकीत वेतनापासून वंचित राहणार नाही, अशी ग्वाही कामगार नेते कॉ. प्रदीप नागापूरकर यांना दिली आहे.