Vidhan Sabha 2019 : औरंगाबाद जिल्ह्यात एकूण 65.67 टक्के मतदान

औरंगाबाद - जिल्ह्यातील नऊ विधानसभा मतदारसंघांमध्ये एकूण 65.67 टक्के मतदान झाले आहे. सिल्लोड मतदारसंघात सर्वाधिक 74.83, तर सर्वांत कमी औरंगाबाद मध्य मतदारसंघात 59 टक्‍के मतदान झाले. सोमवारी काही ठिकाणी उशिरापर्यंत मतदान झाले. त्यामुळे प्रशासनाने अंदाजानुसार आकडेवारी दिली होती. वरील अंतिम आकडेवारी मंगळवारी (ता. 22) रात्री जाहीर केली. 

जिल्ह्यातील सर्व विधानसभा मतदारासंघांमध्ये एकूण 345 केंद्रांवर वेबकास्टिंग देखील करण्यात आले. विधानसभानिहाय मतदान क्षेत्रात प्रत्येकी दोन याप्रमाणे 18 सखी, 18 आदर्श मतदान केंद्र उभारण्यात आली होती. या माध्यमातून वेगळेपण पाहायला मिळाले. 
  
असे आहेत उमेदवार 
नऊ मतदारसंघांत एकूण 133 उमेदवार निवडणूक लढवीत आहेत. यामध्ये सर्वाधिक उमेदवार औरंगाबाद पूर्व विधानसभा क्षेत्रातून 34, तर सर्वांत कमी सात उमेदवार सिल्लोड विधानसभा क्षेत्रातून आहेत. मतदानप्रक्रिया सुलभ होण्यासाठी प्रशासनाकडून सर्व मतदान केंद्रांवर पुरेशा प्रमाणात बॅलेट, नियंत्रण युनिट आणि व्हीव्हीपॅट यंत्रे उपलब्ध करून देण्यात आली होती. मात्र, अनेक ठिकाणी ईव्हीएम बंद पडल्याचे प्रकार समोर आले. 
 
जिल्ह्यातील मतदान केंद्र 
जिल्ह्यात मतदानासाठी तीन हजार 24 मतदान केंद्र होती. यामध्ये सिल्लोड 361, कन्नड 351, फुलंब्री 348, औरंगाबाद मध्य 324, औरंगाबाद पश्‍चिम 342, औरंगाबाद पूर्व 312, पैठण 325, गंगापूर 315 आणि वैजापूर येथे 346 या मतदान केंद्रांचा समावेश होता.