Aurangabad : खुलताबाद उरुसाला भाविकांची मांदियाळी

खुलताबाद : येथील हजरत जर जरी जर बक्ष यांच्या ७३६ व्या उरसाला मंगळवारी (ता.४) संदलच्या मिरवणुकीने सुरुवात झाली. यावेळी पहिल्याच दिवशी लाखो भाविकांनी येथे गर्दी केली होती.उपविभागीय अधिकारी जनार्दन विधाते, उरुस व्यवस्था समिती अध्यक्ष तथा तहसीलदार सुरेंद्र देशमुख, दर्गाह कमिटी अध्यक्ष तथा उरुस व्यवस्था समिती उपाध्यक्ष मोहम्मद एजाज अहमद, सचिव तथा मुख्याधिकारी नंदकिशोर भोंबे, दर्गाह कमिटी सदस्य शेख हबीदोद्दीन, आबेद हुसेन, शेख कामरानउद्दीन, युसुफोद्दीन चिरागोद्दीन, इम्रान जहागीरदार, मतीन जहागीर, मोहम्मद अबरार यांच्या उपस्थितीत खुलताबाद शहरातील हजरत बाबा बुऱ्हाणउद्दीन यांच्या दर्ग्यापासून संदल मिरवणूक काढण्या आली.

यानिमित्त उरुस मैदानात विविध दुकानांसह खाजाची दुकाने, विविध प्रकारचे राहटपाळणे थाटली असून कोरोनामुळे दोन वर्ष उरुस भरला नव्हता. मात्र, आता कोरोना नसल्याने मोठ्या प्रमाणावर दुकाने थाटल्याने दोन वर्षात झालेले नुकसान भरून निघण्यास यंदा हातभार लागेल, अशी प्रतिक्रिया दुकानदारांनी दिली. यानिमित्त हजरत ख्वाजा मुन्तजीबोद्दीन जर जरी जर बक्ष यांच्या दर्गाहवर रंगरंगोटी तसेच आकर्षक विद्युत रोषणाई करण्यात आली आहे. जिल्हा अधिकारी सुनील चव्हाण यांनी येथे येणाऱ्या भाविकांच्या सोयी सुविधांचा आढावा घेतला.

तसेच उपविभागीय पोलिस अधिकारी मुकुंद आघाव यांच्या मार्गदर्शनाखाली दोन पोलिस निरीक्षक, २८ सहायक पोलिस निरीक्षक व पोलिस उपनिरीक्षक, २५० पोलिस कर्मचारी, ७० होमगार्ड असा बंदोबस्त तैनात करण्यात आला आहे. तसेच पोलिस निरीक्षक भुजंग हातमोडे यांच्या सूचनेनुसार विविध ठिकाणी ४७ सीसीटीव्ही कॅमेरे बसविण्यात आले आहे.