Chh. Sambhaji Nagar : पाळीव प्राण्यांना लागणार परवानगी; अन्यथा महापालिका करणार दंडात्मक कारवाई

छत्रपती संभाजीनगर - महापालिकेने पाळीव कुत्रा, मांजर या प्राण्यांसाठी परवाना बंधनकारक केला आहे. सोबतच आता गाय, बैल, म्हैस, शेळी या पाळीव प्राण्यांसाठीही परवानगी घ्यावी लागणार आहे. पाळीव प्राण्यांचे दोन फोटो, आणि शुल्क भरून गाय, बैल, शेळी, म्हैस, घोडा अशा प्राण्यांसाठी परवाना घ्यावा, अन्यथा कारवाई केली जाईल, अशा इशारा प्रशासनाने दिला आहे.

शहरात अनेक वर्षांपासून मोकाट श्वानांना विषय गाजत आहे. श्‍वानांच्या निर्बिजीकरणावर कोट्यवधी रुपये खर्चही त्यांची संख्या नियंत्रणात आलेली नाही. आजही शहरातील चौकाचौकांत व रस्त्यावर मोकाट श्‍वान आढळून येत आहेत. हे मोकाट श्‍वान नागरिकांवर हल्ले करतात. त्यासोबतच आता मोकाट जनावरांचा विषय गंभीर बनला आहे. महापालिकेने काही वर्षांपूर्वी शहरातील सर्व गोठे बाहेर काढण्याचा निर्णय घेतला होता, पण त्याची अंमलबजावणी झाली नाही. जनावरे रस्त्यावर मोकळे सोडली जातात. त्यामुळे वाहतुकीस अडथळा निर्माण होत आहे. त्यामुळे महापालिकेने गाय, बैल, म्हैस, शेळी, घोडा, उंट या पाळीव प्राण्यांसाठी परवाना घेणे बंधनकारक केले आहे.

असा मिळवा परवाना

ऑफलाइन परवाना पशुचिकित्सालय बायजीपुरा येथून मिळणार आहे. परवाना घेण्यासाठी अर्ज, अर्जासोबत पाळीव प्राण्यांचे दोन फोटो, जनावरे ठेवण्यासाठी उपलब्ध जागेची माहिती, पाळीव जनावरे पाळण्यासाठी शेजारी राहणाऱ्या व्यक्तीचे ना-हरकत प्रमाणपत्र, कुत्रा व मांजरीस रेबीज लसीकरण प्रमाणपत्र, मांजरीचे निर्बिजीकरण शस्त्रक्रिया केल्याचे पशुवैद्यकाचे प्रमाणपत्र, परवाना शुल्क भरणे आदींची पूर्तता करावी लागणार आहे.