Aurangabad : गो-ग्रीन’ योजनेमधून वीजग्राहकांनी वाचविले २१ लाख

औरंगाबाद - महावितरणच्या ''गो-ग्रीन'' योजनेअंतर्गत वीजबिलांसाठी छापील कागदाचा वापर पूर्णपणे बंद करत केवळ ''ई-मेल'' व ''एसएमएस''चा पर्याय निवडणाऱ्या औरंगाबाद परिमंडळातील पर्यावरणस्नेही १७ हजार ३६४ ग्राहकांकडून २० लाख ८३ हजार ६८० रुपयांची वार्षिक बचत सुरू आहे.

महावितरणच्या ''गो-ग्रीन'' योजनेनुसार वीजग्राहकांनी छापील वीजबिलाच्या कागदाऐवजी फक्त ''ई-मेल'' व ''एसएमएस''चा पर्याय निवडल्यास प्रतिबिलात १० रुपये सवलत आहे. त्यामुळे सहभागी ग्राहकांची वीजबिलात वार्षिक १२० रुपयांची बचत होत आहे.

वीजबिल तयार झाल्यानंतर लगेचच संगणकीय प्रणालीद्वारे ते ''गो-ग्रीन''मधील ग्राहकांना ''ई-मेल''द्वारे पाठविण्यात येत आहे. सोबतच ''एसएमएस''द्वारे देखील वीजबिलाची माहिती देण्यात येत आहे. वीजग्राहकांनी या योजनेत सहभागी व्हावे व पर्यावरण रक्षणात योगदान द्यावे, असे आवाहन मुख्य अभियंता ‍सचिन तालेवार यांनी केले आहे.

औरंगाबाद शहर मंडळात ८ हजार ९३८ ग्राहक ''गो-ग्रीन'' योजनेत सहभागी झाले आहेत. औरंगाबाद ग्रामीण मंडळात ''गो-ग्रीन''मध्ये ५ हजार ४२४ ग्राहक सहभागी आहेत. तसेच जालना मंडळातील ३ हजार २ ग्राहकांनी ''गो-ग्रीन''मध्ये सहभाग घेतला आहे.

महावितरणच्या ''गो-ग्रीन'' योजनेचा पर्याय निवडण्यासाठी ग्राहकांनी वीजबिलावर छापलेल्या जीजीएन (GGN) या १५ अंकी क्रमांकाची नोंदणी महावितरणच्या मोबाइल अ‍ॅपद्वारे किंवा महावितरणच्या संकेतस्थळाच्या https://billing.mahadiscom.in/gogreen.php लिंकवर जाऊन करावी.

याबाबतची अधिक माहिती www.mahadiscom.in संकेतस्थळावर उपलब्ध आहे. ''गो-ग्रीन'' योजनेत ईमेलद्वारे प्राप्त झालेले दरमहा वीजबिल संगणकात सॉफ्ट कॉपीमध्ये जतन करता येते. सोबतच मागील ११ महिन्यांची वीजबिले मूळ स्वरूपातही उपलब्ध आहेत.