औरंगाबाद : बिबट्याचा मुक्काम आता पाटोदा शिवारात

वाळूजमहानगर : वळदगावनंतर बिबट्याने आता पाटोदा-गंगापूर (नेहरी) शिवारात मुक्काम ठोकला. दरम्यान या बिबट्याने एका गायीवर हल्ला करून एका मेंढीचा फडशा पाडला. यावेळी थरकाप उडालेल्या चार मेंढपाळांनी रात्रभर टेंभा पेटवून स्वतः सह ३०० शेळ्या-मेंढ्यांचे संरक्षण केले. हा थरारक प्रकार रविवारी (ता.१२) झाला.

पाटोदा येथील अशोक कचरु पेरे यांच्या शेतात गट नंबर ९४ मध्ये गणोरी येथील मेंढपाळांनी ३०० शेळ्यामेंढ्याचे आखार बसवले आहे. रविवारी (ता.१२) सायंकाळी बिबट्याच्या डरकाळ्या या मेंढपाळांनी ऐकल्या. त्यामुळे कचरु विठोबा सोनवणे, भगवान उमाजी सोरमारे, मच्छिंद्र एकनाथ महानोर, लताबाई कचरु सोनवणे या मेंढपाळांचा चांगलाच थरकाप उडाला. दरम्यान या बिबट्याने कपाशीच्या शेतात बांधलेल्या गायीवर हल्ला केला.

मात्र गाय दोरी तोडून पळाली. मात्र दोन पिल्लं असलेल्या एका मेंढीचा या बिबट्याने फडशा पाडला. बिबट्या आल्याचे समजताच मेंढपाळांनी टेंभा पेटवून रात्रभर स्वतः सह ३०० शेळ्या मेंढ्याचे रक्षण केले. तरीही बिबट्या वाघोरी भोवती चकरा मारत होता. शेवटी तो पहाटे कपाशीतून मोसंबीच्या शेतातून निघून गेला. सोमवारी सकाळी अशोक पेरे हे शेतात गेले असता हा थरारक प्रकार उघडकीस आला. पाटोदा शिवारात बिबट्या असल्याची माहिती मिळताच सातारा ठाण्याचे पोलीस निरीक्षक सुरेंद्र माळादे, दौलताबाद वनविभागाचे वनपाल एस टी काळे, वनरक्षक आर एस मुळे यांनी कर्मचार्यांसह धाव घेत घटनास्थळी असलेल्या पाऊल खुणाची पाहणी केली.