लढा कोरोनाविरुद्ध : सीएम फंडाला 'बामू' देणार एक कोटी रुपये

औरंगाबाद : डॉ. बाबासाहेब आंबेडकर मराठवाडा विद्यापीठातर्फे मुख्यमंत्री सहाय्यता निधीसाठी एक कोटी रुपये देण्यात येणार आहेत. याबाबतचा प्रस्ताव व्यवस्थापन परिषदेच्या बैठकीत सर्वानुमते मंजूर करण्यात आला, अशी माहिती कुलगुरू डॉ. प्रमोद येवले यांनी दिली. विद्यापीठाच्या आपत्कालीन निधीतून ही रक्कम देण्यात येणार आहे.

'कोरोना'च्या साथीमुळे उद्भवलेली परिस्थिती चिंताजनक असून, या संदर्भात राज्यातील सर्व विद्यापीठे व महाविद्यालयांनी मुख्यमंत्री निधीसाठी निधी द्यावा, असे आवाहन उच्च व तंत्रशिक्षण मंत्री उदय सामंत यांनी केले होते. यानुसार विद्यापीठातील सर्व संवैधानिक अधिकारी, प्राध्यापक व कर्मचारी यांनी यापूर्वीच एकदिवसाचे वेतन १७ लाख ५५ हजार रुपये मुख्यमंत्री निधीत जमा केले आहेत.

मुख्यमंत्र्यांनी मेडिकल सुरू ठेवले, पण हा पठ्ठ्या काय विकतोय पाहा

श्री. सामंत यांनी सर्व विद्यापीठांनी तात्काली निधीतून आणखी निधी मुख्यमंत्री निधीला द्यावा, असे आवाहन केले होते. यानंतर डॉ. बाबासाहेब आंबेडकर मराठवाडा विद्यापीठाच्या सर्व व्यवस्थापन परिषद सदस्यांशी कुलगुरु डॉ. प्रमोद येवले यांनी मंगळवारी (ता.२८) व्हिडीओ कॉन्फरन्सच्या माध्यमातून तातडीची बैठक घेतली. डॉ. येवले यांनी सर्व सदस्यांसमोर आपत्कालीन निधीतून मुख्यमंत्री सहायता निधीसाठी रक्कम देण्याचा प्रस्ताव मांडला. सर्वानुमते एक कोटी रुपयांची रक्कम देण्याचा प्रस्ताव मंजूर करण्यात आला.

HIVप्रमाणे कोरोनाचाही होतो का आरोग्यावर दूरगामी परिणाम - वाचा

या संदर्भात २०१३ मध्ये आपत्कालीन व्यवस्थापन निधी खर्च करण्याबद्दल असलेल्या शासन निर्णयाच्या अधीन राहून प्रस्ताव मंजूर करण्यात आला. या संदर्भात शासनाचे आदेश प्राप्त होताच निधी जमा करण्यात येणार आहे. बैठकीस प्र-कुलगुरु डॉ. प्रवीण वक्ते, कुलसचिव डॉ. जयश्री सूर्यवंशी आदींसह सदस्य सहभागी झाले. यावेळी राज्यपाल नियुक्त सदस्प किशोर शितोळे, ज्येष्ठ व्यवस्थापन परिषद सदस्य संजय निंबाळकर, डॉ. राहुल मस्के, प्राचार्य डॉ. जयसिंगराव देशमुख, डॉ. हरिदास विधाते, डॉ. फुलचंद सलामपुरे, डॉ. राजेश करपे,  प्रा. सुनील निकम, डॉ. शरफूण निहार, सहसंचालक डॉ. डी. के. गायकवाड, निमंत्रित सदस्य राजेंद्र मडके, डॉ. गणेश मंझा आदींनी सहभाग घेतला. सुमारे दोन तास सदर बैठक चालली.